薛家燕唱Lolly Talk《一把火》新鮮感十足 網民：勇敢嘅嘗試

農曆新年要有過年氣氛，當然唔少得睇充滿賀年氣氛嘅電視節目啦！喺年初二（11日），TVB節目《J Music》搵嚟薛家燕做嘉賓，並與潘靜文（Sherman）、蔡愷穎（Lolita）、劉詠彤（Angel）投入合唱Lolly Talk嘅大熱歌曲《一把火》。

喺《J Music》中，薛家燕、潘靜文、蔡愷穎及劉詠彤著上鮮豔熱情嘅紅色服飾，超級有新年氣氛。四人一同合唱Lolly Talk嘅《一把火》，家燕姐主要負責英語部分，而其他部分就交俾三位年青人主唱。家燕姐除咗投入地演繹歌曲之外，佢仲興奮擺動身體及有十字步嘅手部動作，家燕姐果然跟得上潮流之餘，仲非常之玩得。

事後，Lolly Talk成員得知家燕姐演繹《一把火》後，興奮地喺IG回應給轉載片段，例如Elka：「OMG新年歌一把火 旺呀 多謝」、Tania：「新一年一把火 多謝」及Mei Mei：「祝大家紅運當頭過龍年」。

而家燕姐就表示自己唔熟呢首歌，全靠佢哋（潘靜文、蔡愷穎及劉詠彤）陪住佢，同時家燕姐仲大讚佢哋好用心同唱得好好，可以同佢哋合唱係福氣。因為佢覺得同年輕一代歌手合唱，令佢覺得自己後生咗，好似之前唱Jisoo嘅《FLOWER》，佢就多咗好多年輕粉絲。

節目出街後，家燕姐嘅《一把火》版本新鮮感十足，引起網民熱烈討論，例如「我要聽家燕媽媽Rap呀！唱得嗰兩句英文」、「一到家燕唱嗰幾句就立即將首歌變到有皆大歡喜feel，勁」、「勇敢嘅嘗試」、「聽完點只一把火」、「聽完把鬼火」、「真係得TVB先諗到，叫家燕姐唱lolly talk」、「搞到好GAG」、「聽完真係一把火」、「都好聽過Lisa姐唱少女的祈禱」及「笑死 都唔啱佢Key」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！