蘇韻姿轉戰舞台劇「回家」無期 否認與珍姐曾勵珍鬧翻

蘇韻姿（Andrea）憑TVB處境劇《愛·回家之開心速遞》「紅衫魚」熊心如一角成功入屋，原本有望與飾演風少嘅陳浚霆組成CP，但疑因遲到問題未有改善而遭雪藏，劇情交代熊心如要跟前男友朱天梯（梁証嘉飾）到歐洲視察廠房離開香港，之後就冇出現於《愛·回家》。最近佢就忙於為音樂劇《我們的青春日誌》演出，喺接受傳媒訪問時就透露自己想「回家」。

被飛出劇組兼雪藏嘅蘇韻姿，早前6月底已疑似成功解凍，一連出席兩個活動，包括《阮兆輝演藝70樂今宵》綜藝晚會及戶外騷《大笪地唱不停》，不過依然「回家」無期。最近佢忙於為舞台劇《我們的青春日誌》演出，佢喺舞台劇中飾演「收兵娘娘」仁德書院6D班嘅Nancy Lam，角色同「紅衫魚」性格完全相反，再加上要唱歌，所以佢覺得好新穎及享受今次嘅演出。同時佢嘅表現獲得鄭丹瑞（旦哥）大讚，佢除咗表示好多謝旦哥之外，同時表示呢個對佢嚟講係一個好好嘅鼓勵，因為有人睇到佢嘅努力係最緊要。

被傳媒問到係唔係逐漸解凍，蘇韻姿就表示今年嘅工作變化大，有好多唔同嘅嘗試，非常期待之後嘅工作。至於想唔想「回家」呢？佢就話屋企始終都係屋企，點都要返屋企，不過演員係被動，一切都係要等公司安排。咁有冇收到監製通知「回家」？佢就話未收到，不過自己就有計劃返去探班。

另外，近日仲有傳出蘇韻姿約滿在即及與珍姐曾勵珍鬧翻，佢就否認話唔知點解會傳到咁，因為佢同公司仲有好長嘅合作時間，而嚟緊亦有其他工作安排。佢仲話公司好錫佢，所以佢好感激公司俾機會佢，個個人都教佢好多嘢，好感激大家咁錫佢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！