【行山路線推介】百年歷史古道 茅坪廢村探險一日遊

行山有人喜歡挑戰難度，要手腳並用先開心；有人但求出身汗，愈易愈好；另外有人就更冷門，可能喜歡研究山頭野嶺歷史，特別喜歡古道，幻想當年古道佈滿居民嘅情況。如果你係呢種人，就一定要去今次介紹嘅「茅坪古道」，路線中含有幾條廢村，頗有尋幽探秘感覺。

西貢出發 先行北港古道
今次教大家行茅坪嘅路線比較長，因為想多行幾條不同古道，首先就係「北港古道」。從西貢碼頭出發乘坐小巴1、1A、1S、2、12、101M直接於「北港」站下車，可以直接走入北港濾水廠再經過閘口一直走，就會到達北港古道入口位。北港古道為官方行山徑，有完整基建配套及指示牌，先行5分鐘水泥路，就會見到此行焦點之一「竹林」。此處竹林又密又高，更蓋過頭頂形成一條竹林隧道，有人更形容此處為香港「屋久島」。幸好由始至終只有一條路，直行就可以穿過竹林，往茅坪方向前進。

欣賞稀有植物「榼藤」
往茅坪途中有一個不容錯過嘅絕世景點，就係「榼藤」路段。榼藤為香港稀有植物，又名鴨腱藤、鴨見藤，其外型尤如多條飛龍於半空穿來插往，附於其他樹木上懸於半空之中。此處榼藤縱橫交錯，於頭頂穿插，非常趣怪，其中最入面有一棵人稱「藤王」嘅巨榼藤，橫躺半空之中，下面就係一個廢棄廁所，由於景觀特別，被視為必到打卡位之一。不過提醒大家榼藤好脆弱，大家眼看手勿動，更唔好搵佢去借力，以免傷害佢哋，切記保護野生植物呢！

石級上茅坪 廢村探險
經過榼藤繼續上茅坪一段比較辛苦，因為要不斷上石級，連續上10分鐘左右就會去到分岔路及涼亭，左行就係往茅坪，右邊就係轉頭返嚟離開路線。此處一路上都係小梯級，不過沿途都有樹蔭，所以尚算舒服。終於見到最特色嘅茅坪標記，就係荒廢村屋。只見茅坪村早已變成頹垣敗瓦，早於100多年以前茅坪古道為連接沙田與西貢一帶嘅主要路線，當年此處有多條村落，由唔同村嘅村民興建連接成茅坪古道。百多年後所有村都荒廢，人去樓空，只餘下一間間失修村屋，生滿草苔及藤蔓，令人懷念。

轉走大水井古道
離開茅坪，原路折返剛才分岔路，今次走「大水井」方向落山，或者於岔路口涼亭先休息一會亦可以。山徑同樣開揚清晰，一條直路緩緩向下，沿途可以遠眺西貢滘西洲，中途會經過廟宇，直接走到最後就會進入馬鞍山郊遊徑，開始正式落山。沿郊遊徑一直走行5分鐘左右就會到達北港坳，沿途有唔少指示，可以放心跟從，最後見到民居就知已經接近西貢市中心，繼續行到馬路十字路口就會有小巴站，可以乘車回西貢。

******文中所寫路線及圖片只作參考，另受制於地圖功能，某些路段可能有偏差，只用作參考用途，正確行山路線請採用專業行山地圖及正確工具為準。******

茅坪古道遊
行程：西貢碼頭>北港古道>竹林隧道>榼藤巨樹>茅坪古道>大水井古道>西貢
交通：於西貢碼頭乘坐小巴前「北港」站
全長：約5.5公里
時間：約1.5小時（不連同休息時間）