衛詩以色列靈性之旅遇戰亂 入防空洞避難 報平安︰已安全撤離

巴勒斯坦武裝組織哈馬斯上周末突襲以色列，引發新一輪以巴衝突，連日互相攻擊之下造成兩地超過2千人死亡。歌手衛詩(Jill)係基督徒，早前跟隨教會團體到以色列，並準備到非洲提供人道援助。

Jill 9月底更新過IG分享風景照，至以色列受襲後佢喺限時動態發布情況，指自己早上喺防空警號及炮火聲中驚醒，要同教友去防空洞避難。之後Jill又post咗喺防空洞嘅情況，見到佢嘅教友正在跪地祈禱。

Jill唔少朋友同網民都擔心佢嘅安危，到尋日衛詩終於出post報平安，表示已經安全離開以色列。Jill亦提到身處戰區，不時出入防空洞同聽到炮火聲而感到難受，但佢感恩同一批友好共同度過，並希望以巴早日得到和平。

衛詩同家姐衛蘭2015年一同加盟華納，今年亦同時離開公司。Jill曾透露會休息一排，並且出國傳道。早前衛蘭衛詩兩姊妹一齊去美國旅行，據知Janice去完美國就返咗香港，Jill就直飛以色列展開靈性之旅，豈料遇上戰亂。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！