被欽點台慶頒獎禮做司儀 周奕瑋同TVB甩經理人合約轉做普通藝員

早前組合農夫兩位成員C君同陸永，被發現同TVB約滿後未有續約，官網藝人檔案已經見唔到佢地嘅資料。而C君回應話合約交由經理人DJ Tommy處理，而家專注音樂工作。

估唔到話咁快又有藝人同TVB「關係有變」，仲要係被睇好成為金牌司儀嘅周奕瑋。喺TVB官網入面，周奕瑋出現喺男藝人嘅分類之中，而唔係「經理人合約藝員」，簡而言之即係由「親生仔」降呢。同TVB唔再有經理人合約，即係可以搵出面經理人或者自己打點工作，有更多空間之餘，最重要係好多社交平台廣告代言都做得。

2008年加入TVB嘅周奕瑋，由娛樂新聞台外景主持做起，因為識日文同喺日本讀過書，2018年被委派主持黃金時段旅遊節目《周遊日本》而人氣急升，同時亦被TVB轉簽經理人合約。前年又被安排去東京採訪奧運，更加喺今年初嘅《萬千星輝頒獎典禮》頂替離巢嘅Do姐鄭裕玲，單飛肩負司儀重任，而且表現令人讚賞。

周奕瑋回應傳媒時就話「以官方公布為準」，強調會繼續努力工作，但就未有透露原因以及有冇新動向等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！