雅虎香港新聞 
被馮盈盈陰招唱衰收五十萬做扯皮條 江嘉敏：呢個傳聞我有聽過
馮盈盈同江嘉敏因為「富豪船P」事件令姊妹反目，收高層收口令立即上演攬頭攬頸大龍鳳，點知有報道指FYY唱衰江嘉敏做扯皮條收50萬邀她上船，再突然殺出一名「閨密」替江出頭，將兩位當時人對話截圖提供，以證實船P之約是由FYY主動邀約，表面扮friend，私底下不停過招，偽人啊﹗
文：東方新地
馮盈盈同江嘉敏在無綫活動上收柯打扮老友，不過明眼人都睇得出當日兩女此情不再，以為呢場「富豪船P」引起嘅風波從此完結？冇咁易，有人條氣唔順，事件連日繼續發酵，先有報道指馮盈盈出陰招四圍唱衰江嘉敏，向無綫中人指江嘉敏做扯皮條收50萬邀她去船P，為保前程更在高層面前哭訴扮無辜。江嘉敏在IG發功「有啲嘢適可而止就好收手喇，呢個世界好細」言之有物，仲話叫自己唔好嬲。有「閨密」睇唔過眼，替江嘉敏出頭，提供FYY同江的對話截圖，短訊內容中鐵證馮盈盈主動邀請江嘉敏去玩wakesurf，對話如下：
馮：baby，星期六wakesurf？
江：未知通告點，你諗住仲叫邊個？
馮：淨係諗住叫你同埋nam nam、Francis，如果你Okay的話，你想我再叫更多人？
江：都OK呀﹗不過未睇大簿，未100%肯定個期﹗
馮：I see 幫你祈禱。
短訊內容證實馮盈盈做主動約船P，對於短訊截圖流出，江嘉敏直認當日是馮盈盈邀約上船，但就強調短訊截圖絕非由她交給傳媒，至於被唱做扯皮條，江嘉敏直指有聽聞，是從幕前幕後同事中聽過，仲話係人聽到呢啲傳聞都會唔開心，但唔想事件一再發酵，所以唔再回應了。而被爆出陰招反咬江嘉敏的馮盈盈亦即在IG即時動態反擊：「對於坊間一些對我人格失實和指控，我必需澄清絕對冇做過……謠言止於智者，請停止不實傳言讓事件盡快告一段落。」
究竟係邊個咬住邊個唔放？誰是大話精？只有佢哋個至知喇﹗只係知真人版狠人殺跑贏無綫黃金檔劇﹗
同期彈出互片上位
馮盈盈同江嘉敏同年簽無綫，拍劇、做主持齊被力捧，講潛力馮盈盈確係高一線，眼見好姊妹上位走勢凌厲逐漸拋離，江嘉敏早已不是味兒，有人不時在馮盈盈背後放暗箭。二人本來拍住上有仔齊齊媾，船P見光後，江嘉敏要向電競公司高層男友Anthony解畫，為自保不惜犧牲姊妹情。兩女互片終被公司照肺，日前在公開活動扮冇事攬實合照，兩個一樣咁好戲。
馮盈盈、江嘉敏一齊放電收兵
去年底與拍拖四年的十優醫生男友Martin分手，馮盈盈回復單身攞正牌媾仔，與大隻主播鄭衍峰過從甚密，被本刊記者影到揸車接仔返香閨，又斷正一齊返無綫，不過一日唔認愛都仲有變數，早前馮盈盈被踢爆同賭王兒子何猷亨一同到達深灣遊艇會上船參加富豪船 P，她事後澄清是新相識，又指江嘉敏是中間人，不過江嘉敏即反駁冇做媒，自爆船P前眾人早已在飯局內認識，再明寸一句：「佢使乜人介紹呀？」好姊妹各執一詞，火藥味漸濃，江嘉敏更唔肯罷休。
三年前馮盈盈與江嘉敏合作劇集《果欄中的江湖大嫂》而成為好友，大家都是新晉小花無所不談，知情者透露：「盈盈同 Kaman同期出身，兩個都係心直口快嘅人，一行埋就嘈喧巴閉，嗰時拍《果欄中的江湖大嫂》Kaman被指主動姣黐黃嘉樂，其實就同盈盈喺片場鬥姣，成日傾男仔經點樣冧仔，拍住上一齊收兵囉！有傳 Kaman都唔係省油的燈，雖然有個電競公司高層男友，不過佢未滿足，依家當係騎牛搵馬，佢去得富豪飯局同船 P，都想搵個富二代冧吓，點知冇人吼，反而盈盈就好受歡迎，Kaman極度唔順超，船 P見光後，Kaman畀男友問長問短，佢更加要先發制人，將所有罪名推畀盈盈。唔止呀！佢最叻就係冧監製同幕後，眼見盈盈好多劇開極速上位，佢睇唔過眼不斷抹黑，平時開工會喺背後放暗箭講對方壞話。」
馮盈盈生日江嘉敏冇影 照肺後扮和好
在圈中是非當人情好普遍，江嘉敏的所作所為馮盈盈點會唔知，不過身為世界女，多個朋友好過多個敵人，日前江嘉敏再得寸進尺，在IG留言：「知人口面不知心」直斥有人講大話後，馮盈盈才將擘面行動升級，公開回應時把江嘉敏由「姊妹」降呢成為「朋友」。過往friend過打band經常約high tea影姊妹相的馮盈盈與江嘉敏，船P後再沒私下見面，6月10日馮盈盈26歲生日，另一好姊妹劉佩玥買蛋糕為壽星女製造驚喜，江嘉敏冇影，對於會唔會一齊慶祝，馮盈盈說：「佢（江嘉敏）有祝我生日快樂，但都係要就時間，大家仍然係同事、朋友。」盈盈摸清江嘉敏底細，寧可保持距離。
兩大新晉花旦參與富豪船P，公然隔空開火擘面，終於觸動高層神經，據知情者說：「件事搞大咗其實對盈盈同Kaman都冇好處，盈盈識得封口想淡化件事，係Kaman唔識死仲繼續辣火頭，最終搞到畀公司照肺叫佢好收聲扮冇事。」日前馮盈盈與江嘉敏擘面後首度同場，二人交足戲攬實合照，皮笑肉不笑，今日就話爭上位爭收兵，再過多幾年爭視后應該會仲精彩。
延伸閱讀：
