雅虎香港新聞 《親親我好媽》獲好評 回顧無綫過往校園劇集
無綫劇《親親我好媽》自播出以來，成功成為網上熱門討論話題，口碑及收視都不俗。故事以香港怪獸家長心態同教育制度問題作背景，唔少網民大讚劇情貼地及有共鳴，亦成功勾起唔少觀眾及網民嘅「那些年」。不如盤點一下無綫過往嘅校園劇啦！
《青出於藍》
劇集由收視福將歐陽震華、陶大宇同郭可盈擔正，由李克勤主唱主題曲《開學禮》更加喺經典，只要聽到頭兩句「同學各位找個位 這是你的開學禮」，大家已經立刻loop到呢套劇。劇中描述唔少學生喺校園內外嘅趣事，當中仲有老師之間嘅戀情，相信唔少八十、九十後都會睇過呢套劇。
《四葉草系列》
無綫2003製作嘅青春偶像劇「四葉草」系列，由首部曲《當四葉草碰上劍尖時》、二部曲《赤沙印記@四葉草2》、三部曲《盛裝舞步愛作戰》都十分受歡迎。此系列仲捧紅咗一堆四葉女：黃婉佩（Race）、唐詩詠、姚子羚、徐子淇、Mandy Lieu、傅嘉莉等等，而劇中嘅年輕愛情橋段亦引起唔少觀眾嘅甜蜜回憶，各位做到喪屍咁嘅上班族不妨可以睇番，滋潤下心靈。
《點解阿Sir係阿Sir》
雖然故事情節同電影《逃學威龍》十分相似，被網民抨擊有抄襲之嫌。不過劇中亦有唔少經典情節，就好似鍾嘉欣當年一場喊戲，高呼「點解你哋唔可以呃我一世」嘅場面就令到不少網民動容，仲有網民推舉佢做視后。另外亦有網民發現飾演女學生嘅演員當中，出現一位疑似阿婆。而劇集中亦有不少穿崩位，各位除咗懷緬過去之餘亦可嘗試找錯處。
《尖子攻略》
由歐陽震華及鄧萃雯主演，劇情主要講述歐陽震華同鄧萃雯點樣幫一班年輕足球員兼應屆會考生進行會考前特訓，喺會考攞高分。會考應該係絕大部分香港人都經歷過，所以唔難引起觀眾共鳴。
《阿Sir早晨》
「阿Sir早晨」由當年四大天王中嘅黎明主演，亦係佢喺TVB最後嘅一部劇集。故事講佢失業之後，去咗一間中學做代課老師。任教期間令佢諗起各種青春回憶，令佢重新振作，最後更同學校社工同心（李綺虹飾）發展感情。
以上邊套校園劇令你最深刻、最有共鳴呢？
