詹天文Windy唔知吳卓羲是誰被指唔尊重前輩 有網民幫口：妹妹仔唔識好正常

詹天文（Windy）於2021年參加《聲夢傳奇》時僅15歲，5歲已接受聲樂訓練嘅佢雖然早於第9集失準出局，但比賽結束後仍有幸被安排與炎明熹（Gigi）、姚焯菲（Chantel）和鍾柔美（Yumi）組成女團After Class，四小花亦推出SOLO歌曲，現時已17歲嘅詹天文4月份推出《沒有你的新學期》MV，其校服造型被讚青春及樣貌愈大愈標緻，除咗激似KOL米露迪（米媽），更被指撞樣星夢師姐菊梓喬。

詹天文日前出席港台活動接受訪問表示開心，指菊梓喬好靚女，仲話咁講就好似間接稱讚自己咁；被問到菊梓喬緋聞男友吳卓羲係咪喜歡嘅男生類型時，詹天文就回答唔知邊個係吳卓羲，而自己由小學開始就好鍾意男團TFBOYS成員王俊凱，稱讚對方高大靚仔。部分網民覺得詹天文咁細個，妹妹仔唔識吳卓羲都好正常，表示佢個年紀都唔係電視一代等等；不過都有部分網民直斥詹天文無禮貌，好唔尊重前輩，又重提當年詹天文參加《聲夢傳奇》特備節目《聲夢前傳》見到李克勤個反應，詹天文於節目中表示見到李克勤第一個反應係問炎明熹：「佢係邊個？」，更直言：「真係唔識佢，當佢自我介紹之後，我先知呢個人係邊個。」網民當時就指責詹天文無禮貌又無做好功課：「唔識都唔好甘（咁）冇禮貌啦」、「連克勤都唔識仲想做歌手？」、「要係（喺）香港樂壇搵食居然唔識李克勤」、「說不認識李克勤，功課沒有做好，那對香港樂壇和歌又認識多少呢？ 有些誠意略欠逢」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！