認識廉航的十件事

現今廉航當道，著名CNN主播Richard Quest上個月完成一個商務旅行挑戰，就係喺八日內，由倫敦出發，先後到達布魯塞爾、布拉格、杜拜、哥倫坡、新加坡、悉尼、檀香山、洛杉磯、紐約，再返倫敦，到訪九個國家或地區，搭十程飛機，十程都係選搭廉航，機票錢總共用咗$2,345美元(約$18,187港幣)，得出十件認識廉航嘅事。

1. 載客量強勁
如今嘅廉航，同20、30年前有好大分別，就以瑞安航空(Ryanair)為例，歐洲最大航空公司，規模比漢莎集團或AIG仲要大，每年載客量高達1億人次。

2.「低成本」唔係指乘客
廉航可以提供更平票價，全因將成本減低，乘客未必係最大得益者，航空公司都好有著數。航空公司可以從多方面嘅服務或產品，獲得更高利潤，就算一個袋、一杯飲品、一件行李都可以收費。航空服務減少，一架飛機嘅轉飛程序變得快，20至30分鐘就可以起飛，比傳統航空公司飛多幾轉，分分鐘賺得仲多。而且，用同一班機組人員，跟機即刻飛回程，安排機組人員喺外地嘅成本又可以慳埋，計計下，航空公司真係賺得多，慳得仲多。

3. 梱綁式銷售
除咗一張機票一個機位，其他服務同產品都拆得更細，好似行李費、飛機餐等，你睇最近某香港廉航行李費加價，加到比票價更貴；而機上膳食都有唔同收費，千萬唔好睇小一杯啤酒，廉航有25%收入都係來自周邊產品。

4. 商務旅客得益
廉航喺短程航線嘅網絡十分龐大，以歐洲為例，英國航空同德國航空，只有三個基地，而廉航嘅瑞安航空同Easyjet就有幾十個基地。基地多，航點同班次都較多，商務客為咗有更配合工作時間需要嘅航班，都會選搭廉航。

5. 服務簡單
廉航嘅服務都係非常簡單、清晰同直接，好單純嘅一種交通工具，就算有少量廉航會提供商務艙或商務型嘅產品，但同一般航空公司比較，仍然簡單得多。

6. 捷藍航空免費服務最多
Richard比較過十程嘅廉航，發現捷藍航空(JetBlue)提供最多免費服務，有一個儲
藏空間，俾乘客保存食物同飲品，亦有免費電視娛樂，竟然連免費WiFi都有。

7. 挪威航空快運有潛力
挪威航空快運(Norwegian)發展廉航有一段時間，佢哋喺歐洲嘅增長速度好快。已經訂咗40幾架787夢想客機，發展長途嘅廉航，亦計劃喺巴黎設立基地，開闢更多嘅航點。

8. 幫襯額外機位優惠，可以搭得舒服啲
好多航空公司，包括廉航都容許乘客多買一個機位，或者會提供優惠吸引多買一個機位，因為多買一個位，空間多啲、寬敞啲，自然就舒服啲，攤喺度瞓都得。

9. 冇期望=有驚喜
揀得搭廉航，志在夠平，所以唔會有太高期望。如果好似挪威航空快運係用787夢想客機咁，係有真皮機椅、椅背娛樂，又好似捷藍航空咁，有免費WiFi，真係會好驚喜。

10. 絕對有得做
越來越多廉航出現，就證明真係有得做。雖然，Richard話咁密集搭廉航係好累，但如果夠時間，每搭完一程，休息幾日，再搭一程，其實都可以一直搭廉航。

相片來源：fourcolortransport ＠tumblr