買科技股3年輸半億 6百萬醫藥費醫老公 肥媽退休唔成復出開個唱

紅館個唱熱潮停不了，後生想睇嘅歌手以外，主打大齡歌迷嘅肥媽Maria Cordero亦準備攻陷賀歲檔，喺年初六同初七(1月27、28日 )開2場紅館show。

今日有傳媒同肥媽嘅專訪出街，肥媽提及本來2016年嘅紅館個唱係佢「收山」演出，正式告別紅館，但係基於2個原因而要重出江湖。68歲嘅肥媽後生時捱過，而家有樓有鋪位供滿揸手，再跑數都冇有怕。

肥媽6年前眼見積蓄有四五千萬現金，加埋唔少物業，計落覺得係時候退休。後來有人介紹肥媽投資經營電燈生意嘅香港科技股，對方仲拍心口話「輸咗就畀返你」，點知隻股票真係暴跌。肥媽仲話當日喺TVB拍緊烹飪節目，睇住隻股票由8蚊跌到得8毫，後來直情得返8仙，5千萬投資最後得返2百萬。當初保證賺硬嘅介紹人，更加輸到破產，肥媽都冇辦法叫人賠，佢慶幸自己唔係炒孖展，蝕極有個數。

但對肥媽嚟講，呢6年最大損失應該係老公Rick因病逝世。1999年同肥媽結婚嘅Rick，喺肥媽退休後第2年（2017年）發現患上肺腺癌。為咗令最愛有最好治療，肥媽負責Rick嘅龐大醫療開支，佢透露金額至少6百萬。不過Rick病情未見好轉，最終喺2020年11月逝世。

投資失利加上老公離世，令肥媽感悟到「個天要你做嘢」，亦感恩退休嗰段時間同Rick周圍去，亦有健康可以應付工作，即使跑唔返輸咗嗰半億，都叫做追返啲。肥媽自言唔少物業已經供滿，已經寫定平安紙分身家畀兒孫。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！