【賀歲片巡禮】黃百鳴第N套《家有囍事》 甄子丹《肥龍過江》係咪《瘦身男女》？

鼠年賀歲檔同大家率先介紹過黃子華自編自導嘅《乜代宗師》同旺角活地亞倫葉念琛作品《我的荀盤男友》，賀歲檔又點止得2部戲咁少?今年唔例外繼續有賀年孖寶黃百鳴同王晶嘅出現，2位都係賀歲片常客，雖然近年作品風評參差，不過可以由80年代玩足幾十年，橫跨到今時今日，不得不寫個服字。

《家有囍事2020》

1992年嘅《家有囍事》堪稱港產賀歲經典，因為當年大收旺場而演化出之後嘅《花田囍事》、《97家有囍事》、《家有囍事2009》、《花田囍事2010》、《最強囍事》等等。喺《家有囍事》飾演出軌偷食大哥常歡嘅黃百鳴喺以上所以電影皆有幕前或以幕後身份參與，就算呢幾年無咩《囍事》系列，一樣年年有賀歲片推出，今年再度回歸導演位置，夥拍張智霖、張繼聰、周秀娜及陳靜等人，炮製出《家有囍事2020》！

故事講述老千三兄弟遇上同為老千嘅姊妹花，識得變魔術同出千嘅佢咃無去發大財，反而用自身千術捉黑社會大佬！以《家有囍事》為名推出一版又一版賀歲片，幾有炒冷飯食老本之嫌，黃百鳴勁在知自己炒冷飯，所以一早自嘲，笑自己無創意，咁反而塞住負評。最開心應該係舒娜（陳淑蘭 飾），佢由92年版嘅小三終於等到2020年坐正！

《肥龍過江》

另一孖寶王晶今年無再拍《澳門風雲》，而係同谷垣健治一齊導演，兼參加幕前演出！有睇開80、90年代港產片嘅朋友對王晶演技唔會陌生，《精裝追女仔2》、《賭俠》，近年嘅《我老婆係賭聖》到《賭城風雲》都見到佢身影，今次於《肥龍過江》相信都係角串性質，因為主角係甄子丹！

隨住《葉問4》上畫，甄子丹似乎想轉下形象。之前拍《大師兄》動作連場不過多咗教育意義，做好打得嘅老師春風化雨；今次於《肥龍過江》挑戰喜劇之餘仲挑戰肥仔look！話說由佢飾演嘅朱福龍因為被女飛而暴飲暴食，六個月後由精壯男子變成了二百多磅的朱福龍。雖然變咗肥仔一樣有工開，奉命押犯去日本，可惜過程超唔順利，結果當然唔少得以動作功夫破案！

《肥》嘅賣點應該係睇甄子丹化個肥仔特技妝喺東京地標大打出手，有無劉德華《瘦身男女》咁得人鍾意就要過年先知，我反而好奇《肥》本來於2019年上映，延遲到2020年賀歲檔，故事大綱又刻意唔提朱福龍係警察，係有心定唔覺意？