【賺人仔去到盡】北上發展藝人玩抖音 短片睇到網民尷尬癌發作

近年越嚟越多藝人北上搵真銀，佢哋都會踩入抖音市場，不惜施展混身解數，上載自家騎呢短片，務求可以贏得內地粉絲嘅歡心，當中包括佘詩曼、王祖藍及羅嘉良等等。而家又同大家回顧一下邊位藝人嘅短片睇到大家尷尬癌發作喇！

佘詩曼
憑《延禧攻略》飾演嫻妃一角喺內地人氣急升嘅佘詩曼，事業發展更上一層樓。早前佢喺抖音上載咗一條佢咬住一支串燒竹籤嘅走路短片，身後仲有兩個大漢做跟班，完美演繹「六親不認步伐」。唔少內地網民都大讚佢充滿霸氣同好有型，不過香港嘅網民就唔多受落，紛紛留言話佢好老土、冇晒星味及好核突等等。

羅嘉良
三奪視帝嘅羅嘉良轉戰內地，不時拍搞笑短片與內地網民分享，上年佢都有唔少睇到人尷尬嘅短片，例如天橋跳大媽舞及將《難兄難弟》經典角色重現，不過最經典嘅一定係挑戰吞拳頭，片中話自己願賭服輸，之後就將成個拳頭塞入口中。唔少香港網民都覺得好唏噓，紛紛留言話騎呢、越睇越尷尬及視帝竟然淪落到扮小丑等等。

李思捷
轉戰抖音市場嘅李思捷，不時上載搞笑短片冧內地粉絲，繼扮「四大天王」唱歌跳舞及著白背心扭身扭勢娛樂大家後，佢早前上載一條用濾鏡將自己變醜及賣萌，可惜佢啲短片嚇親唔少香港網民。

曾志偉
曾志偉不時上載趣劇到抖音帳戶，一展其搞笑作風，唔少內地網民們都表示笑到捧腹大笑。早前佢上載多條為直播賣酒做宣傳嘅短片，片中佢不惜扮女人，雖然不乏捧場客，當日嘅直播仲有過千萬人觀看，但香港網民就睇到打晒冷震。

王祖藍
早年憑綜藝節目喺內地爆紅嘅王祖藍同樣加入「抖音」行列，除咗孖老婆李亞男拍片講生活點滴之外，早前佢就上載咗一條扮忍者龜嘅短片，片中佢一步一步咁示範點樣可以成為忍者龜，之後仲發起烏龜挑戰，不過就好似無其他藝人跟隨。為咗討內地粉絲歡心，今次佢都算花盡心思喇！

楊明
是非纏身嘅楊明，上年初開設咗抖音帳戶，初期時佢就拍咗一條名為「有個明星男友是種甚麼體驗」嘅短片，片中佢原本坐喺梳化接受訪問，佢叫記者停一停，之後行去鏡頭方面，連粉絲叫佢影相同簽名都唔理，直接行去女仔隻手嗰邊， 仲話「不好意思，我的女朋友在等我」。雖然有唔少內地網民大讚佢靚仔，代入成為女朋友身份，但香港網民就話佢同魏駿傑撞樣及話睇到好尷尬。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！