《超時空男臣》結局疑為續集鋪路 大家滿唔滿意呢個結局?
![image](https://s.yimg.com/ny/api/res/1.2/EvgOZrmz.RAXqs5Z7gjp0g--/YXBwaWQ9aGlnaGxhbmRlcjt3PTk2MDtoPTU0MA--/https://68.media.tumblr.com/7c728dd2c2460e0fbfa2bd9565484a96/tumblr_inline_ovdlphv48Y1u03abq_1280.png)
無綫熱播劇《超時空男臣》劇情雖然唔係新鮮,更被網民圍插指有炒劇之嫌,但勝在輕鬆搞笑、演員演得生鬼,贏得唔少觀眾喜愛。去到噚晚,劇集終於大結局啦,但係結局伏線太多,似係為續集鋪路。
小冬(何廣沛飾)終於向大軍(蕭正楠飾)承認自己就係禍國宦官魏忠賢,為咗唔想大明滅亡,所以決定唔返明朝。經過一輪爭拗後,大軍終於決定放棄返回明朝,三人留喺現代開心快樂咁生活落去。
![image](https://s.yimg.com/ny/api/res/1.2/7UprK91xdSOZ92xGH1fiMQ--/YXBwaWQ9aGlnaGxhbmRlcjt3PTk2MDtoPTU0MA--/https://68.media.tumblr.com/b2dde1394b61b20b4ac71649fa18cc50/tumblr_inline_ovdku7pWAy1u03abq_1280.png)
而劇中嘅大奸角張誠(鄭子誠飾)帶埋卓華(徐榮飾)返回明朝,宣布三位男神袁崇煥(蕭正楠飾)、左光斗(曹永簾飾)、李進忠(何廣沛飾)及太子妃(王君馨飾)已經身亡,仲幫佢哋立墓碑。
點知喺立墓碑時,四人喺現代困lift,仲突然心絞痛。獲救後發現身邊所有人都唔識佢哋,冇晒同佢地有關嘅記憶,左光斗翻查史書發現明朝歷史改變咗,仲影響咗後人嘅發展,最終四人決定返去明朝撥亂反正。臨走前大軍去咗見大小姐,然後喺遠處講「大小姐,再見!」套劇咁就做完啦。
![image](https://s.yimg.com/ny/api/res/1.2/NDTwiHadc7yt_D7vPJVV6g--/YXBwaWQ9aGlnaGxhbmRlcjt3PTk2MDtoPTU0MA--/https://68.media.tumblr.com/de239759b1dc09256d7f74b524a61587/tumblr_inline_ovdkufRAAR1u03abq_1280.png)
![image](https://s.yimg.com/ny/api/res/1.2/Dncc4tgPVZRiI1qTZitrSg--/YXBwaWQ9aGlnaGxhbmRlcjt3PTk2MDtoPTU0MA--/https://68.media.tumblr.com/d1e49586cbaf374d317a5e8728826c9b/tumblr_inline_ovdkusSQjk1u03abq_1280.png)
![image](https://s.yimg.com/ny/api/res/1.2/5PEJm2PzxJPXUzl3hPXilQ--/YXBwaWQ9aGlnaGxhbmRlcjt3PTk2MDtoPTU0MA--/https://68.media.tumblr.com/1431a38402c5118d1d0f4cb46178a876/tumblr_inline_ovdkv1rhdo1u03abq_1280.png)
結局有彈有讚,有網民話「個結局唔知想點」、「好多嘢都冇交代」、「留低太多伏線想拍續集」、「結局超膠等」。同時亦有好多網民讚個結局係「意料之內又合情合理」、「近年少見有水準嘅劇集」、「結局有遺憾」,「但又幾特別同淒美」,「令觀眾難忘」、更有觀眾話睇到想喊,唔知大家又滿唔滿意呢個結局呢?
劇集之前一直有傳會拍續集,仲話黃翠如將會加入同埋初步構思都已經諗好埋,就係改為由現代返回古代,講三位男臣會帶埋「大小姐」田蕊妮同「二小姐」朱晨麗一齊返去明朝, 講下佢哋會唔會唔習慣等等,雖然拍唔拍續集就未知,不過已經贏盡話題啦!