送一百位女孩回家|蔡少芬自爆做媽媽辛苦但享受 激讚內地生活:好得沒得再好了!
蔡少芬(Ada)於2008年下嫁內地男星張晉,係圈中嘅模範夫妻之一,婚後二人育有2女1子,一家五口幸福美滿。蔡少芬喺2011年憑《後宮甄嬛傳》爆紅,攀上事業另一高峰。近日佢喺內地綜藝節目《送一百位女孩回家》擔任嘉賓,期間自爆做媽媽嘅辛苦、大讚移居上海後生活方便,仲大爆曾經喺事業高峰時試過一年冇戲拍。
蔡少芬喺節目開頭就自爆做媽媽好辛苦,不過就好享受。佢非常認同主持人話出於母愛而早起身,7點半起身已經好好,如果要幫囡囡煮早餐或者整頭髮嘅話,佢要凌晨5點幾起身。有時囝囝凌晨4點會突然叫佢,之後佢就要起身搵奶咀俾囝囝,醒咗之後就無法入睡。然後再隔一陣,佢又要照顧囡囡,仲話差唔多10年冇完整咁睡眠。另外,佢仲話試過一邊抱住囝囝,一邊炒菜,因為當時囝囝點都要跟住佢,喺無辦法嘅情況下只好抱住囝囝,所以搞到佢個肩膀到而家都會痛,無辦法往後伸展。佢仲話每次帶晒三個仔女出去,都要帶好多日用品,所以搞到佢腰背勞損。
講到移居上海,佢就話佢哋一家人已經喺上海住咗一年,佢好感激孫儷嘅幫忙,因為當時佢哋初初到達上海,人生路不熟,孫儷就好細心為佢哋打點。另外,佢亦激讚內地好到冇得再好,生活非常方便,因為喺香港好多時要落街買嘢,而內地好多嘢都可以透過應用程式送到家門,想外出又可以網上約車,及用共享單車代步。
至於演藝事業方面,蔡少芬就話佢以前有好重嘅偶像包袱,不過喺1995年後已經丟下,喺1995年之前佢感到好驕傲,因為有一段時間佢係同李連杰及周星馳拍電影,再與劉德華拍MV,連媒體都話今次係你啦,而佢亦以為應該輪到佢,點知就試過一年都冇人搵佢拍戲。之後佢就發現當自己以為係高峰嘅時候,唔好以為係真,因為會突然之間冇晒。蔡少芬仲覺得娛樂圈好現實,因為有人搵你就有嘢做,當冇人搵嘅時候係連選擇嘅機會都冇,人哋覺得你已經跌下來就不一樣。蔡少芬學會坦然面對人生,就算當時傳媒封佢做TVB「四大花旦」,佢都冇自滿,仲一直努力默默耕耘,最終喺1998年成為最年輕嘅視后。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!