《造星IV》正式開戰！ 莎莎Gao獲點名讚 有MIRROR影子

由ViuTV舉行的選秀真人騷《全民造星IV》明日首播，昨日先在商場舉行造勢記者會。節目監製花姐和經理人戴穎點名睇好「莎莎」和「燒賣」，導師許廷鏗則為趙展彤（VAL）加持，合力催谷收視！一班參賽者搏到盡，在台上勁跳主題曲《前傳》，跳到舞台震動！

節目有96名參賽者，但昨日只得81人出席記者會，而ViuTV董事兼總經理魯庭暉亦有到場打氣。花姐在台上點名讚「莎莎」（坂部佩莎）性格癲喪似人氣男團MIRROR成員Edan，對她有種特別的愛，又指Gao（沈貞巧）有對兜風耳，跳舞似Lokman；戴穎則睇好「咖喱」（黃雅慧）和「燒賣」（曾業喬）。

許廷鏗自認「嚴父」

對於獲睇高一線，莎莎大感驚訝，賣口乖讚花姐友善：「冇鬧過我，同電視睇到嘅佢唔同。（加入契女行列？）唔敢當！」而年僅16歲的中學生燒賣深得高層歡心，問到身形矮小，會否覺得較輸蝕？她望一望身旁的莎莎，然後說：「唔覺輸蝕，聽講人高心臟負荷比較大，矮有矮嘅好處！」

擔任導師的許廷鏗與參賽者VAL相識12年，但自言不會偏心，反而會更加嚴格，並自爆節目中曾痛心地鬧過她一次，自認是不懂讚人的「嚴父」：「組員話我唔識笑，知道眉頭深鎖好樣衰。」

至於「家屬組」參賽者包括林師傑姨仔Bubu（歐陽巧霖）、余香凝妹妹余潔滢和ERROR成員193的妹妹「3妹」（郭嘉盈），當中余潔滢直言節目未播已有人將她與家姐比較：「睇化，心裏有數，希望大家記得我。」而3妹獲粉絲舉牌支持，她感激粉絲落力應援及送飲品給各女生。而捲土重來的參賽者夏子涓、方芷欣（方方）及鄭嘉欣（Christine）不覺得有優勢，反而覺得壓力更大，當中身高1米78的Christine更自爆由斯文變狂野。