《還是要相信愛情啊》

雖然我只係做咗廿幾年人，但身邊好多同齡朋友好似已經身經百戰喺度感嘆「愛情唔可靠呀」「男人信什麼？」「我以後唔投入去愛人啦」等等。呢類人好似已經下定決心，唔再相信真愛會出現喺自己身上。即使過去嘅傷害令你今日萬念俱灰，但係，想得到愛情，你必須先去相信愛情。

愛情，某程度上都係一種信念，一種你要相信佢先會存在嘅概念。又或者愛情同見鬼一樣，除咗需要運氣，都需要你相信有鬼，你先會覺得自己係撞鬼。當你否定咗愛情，以後出現嘅任何感情，你都會否定佢係屬於愛情。

一次又一次經歷愛情失敗的確會令人感到氣餒，被背叛過咁多次彷彿世上嘅男人都係騙子，明嘅。但係要記住，唔好被打倒！每段愛情嘅失敗都總有佢嘅原因，而嗰個原因就會成為你嘅養份，令你更加知道咩係愛情。從來唔可靠嘅唔係愛情本身，係人類本身。會背叛會離棄你嘅，唔係愛情，係人類。否定愛情存在唔會令你免受傷害，學習去識人學習去經營一段關係，先會真正幫到你去得到幸福。

愛情，一直都存在。只係有啲人比較順利得到，有啲人要經歷好多先至得到啫。