雅虎香港新聞 邵子風出PO追數 呂方太太發聲明反擊：嚴重不實地抹黑本人
曾與楊詩敏（蝦頭）拍拖嘅邵子風，日前（5日）突然喺社交網站出PO向呂方太太伍惠寶（Rainbow）公開追數70萬，追數一事嚟到今日再有新進展，伍惠寶喺今日（9日）於社交網站發嚴正聲明反擊，指責對方嚴重不實地抹黑佢！
日前，邵子風喺社交網站出PO向呂方太太伍惠寶公開追數，除咗以「歌手呂方太太伍惠寶小姐 見字請主動聯絡我 否則我交專人處理」之外，仲公開疑似二人嘅對話截圖，：「2019年2月message 2018年100萬出，2020先收得番你30萬…餘額70萬 未計你呃其他同學錢！你已讀不回繼續扮無嘢…我直接搵東張開你兩公婆波！睇下邊個要面子多d！」之後，伍惠寶喺帖文留言：「我可以正面在這裏公開回應」，邵子風回覆：「哈哈！請問你呃過幾多個同學錢？有無D係我未知？」
之後邵子風再發文直指對方嘔心，力數對方不是兼大爆佢連寡婦嘅錢都呃：「好X嘔心呀企業家！...無厘頭執左公司、自己走去破產，係咩嘢玩法？然後四出去搵同學「動之以情」，保持自己生活質素，住大屋、揸靚車、養番狗、打本俾細佬做生意… 就係唔找數！執左公司好似大X晒咁！我有個同學，寡婦帶住個小朋友，人地連亡夫都搬出黎求佢，佢咪一樣唔X俾！人地當初俾錢你，係因為友情，人地問你攞番錢，你就變番做企業家講生意！可憐人地孤兒寡婦嘅生活費就俾你吃喝玩樂！...」
結果令到伍惠寶再次現身留言反擊，回應網民並澄清不涉及借錢：「從來不涉及借錢，邵先生白紙黑字入股的， 我有文件作證，不過公司當時經歷運動及疫情， 絕對沒有條件股東退股便立即退股，這是一個非常正當的商業行為，而不是隨心情而設立的遊戲！」
去到今日，伍惠寶於社交網站發嚴正聲明反擊，指責對方嚴重不實地抹黑佢：「有關邵子風（網名）近日於他其中一個個人facebook網頁嚴重不實地抹黑本人，本人就此作出一次性澄清，及後會交由律師及警方處理：
本人絕對沒有逃避邵先生，當我在他平台立即回應後，並遭到封鎖，令我滅聲。本人現在就此作出聲明。
五年前邵子風(網名)主動提出向當時公司投資作小股東，並建議在公司出任 marketing manager 一職，受薪每月3萬元正，但工作表現強差人意，於是向他提出不用上班，他同意，之後就不停要求取回投資資金。商業入股是正當商業行為，大家協議簽下合同，絕不能隨時入股，隨時退股，這是基本的商業原則，不能輸打赢要。
當時邵先生向我提出有財困，在多年朋友立場上，於是我出於好心私人給他三十萬應急，這是盡我所能。及後該公司經歷運動及疫情，一年後大股東無可奈何地亦結束公司，自己亦不能獨善其身，我亦向邵先生表明清楚當時的情況。
每個人都會因應自己的經濟狀況而投資，不可能動之以情，所以必然有法律文件作管束，不任由人因時間過去有變化而反口亂說一通，本人絕不會作法律以外的不當行為，此生亦從不向任何人借過錢。本人對邵子風非常失望，這幾年投資失利的不只我和他，但凡投資失利後都反過來發爛罵別人呃騙，那以後還有合資公司麼？
本人在此呼籲及警告，對此人要非常小心警惕。本人已就此誹謗事件、所有有關人士及其whatsapp恐嚇我和家人之訊息已經作出報警立案及交由律師處理，就此不會再作出公開回應。
溫馨提示：就此有關的所有公開言論及轉載，本人會保留一切法律追究權利。
伍惠寶
2023年10月9日」
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
