郭少芸買54份禮物慶祝自己生日 鑽戒以外豪洗百萬購入名車

郭少芸於2021年TVB劇集《星空下的仁醫》飾演麻醉科顧問醫生郭葆晶之後就轉戰內地發展，參與商演活動及直播帶貨工作，同時已移居杭州嘅佢，不時會拍片分享生活日常。然而，郭少芸即將於周五（25日）迎來54歲生日，除咗預告會於當日直播派禮物與粉絲慶祝、與多名小鮮肉到海底撈食火鍋慶生，亦為自己準備咗54份生日禮物，包括名牌手袋及過百萬名車，從禮物嘅重量睇得出郭少芸呢幾年搵到盤滿缽滿。

郭少芸將54歲生日過得甚有儀式感，身後擺滿寫晒歲數嘅黑色禮物盒及氣球，表示準備咗54份禮物畀自己：「之前一直忙着拍戲，都沒有好好過生日，這一次我要把之前所有的禮物都補上！」郭少芸當住鏡頭前拆禮物，1歲生日禮物係波板糖、8歲生日禮物係公仔，而18歲成人生日禮物就由玩具搖身一變，變成現時市價7萬多元嘅CHANEL手袋，到28歲生日禮物就係鑽戒，之後嘅禮物分別有燕窩、護膚品、潤喉糖等等。至於今年54歲生日禮物就最大份，竟然係一部價值過百萬嘅保時捷名車，佢仲剪接咗自己從名車走出來嘅畫面。郭少芸加入直播帶貨短短兩年多，有指佢曾於一次商演向主人家講生日快樂就收咗5萬人民幣；除咗先後於順德及杭州置業，其杭州千呎豪宅擁有闊落客廳及大露台，亦曾經拍片公開一日開支，食嘢買嘢兼請人上門美甲洗咗2040元人民幣，大晒收入可觀嘅一面。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！