郭少芸返香港反被內地人教搭地鐵 網民：不如話自己唔識講廣東話

郭少芸近年轉戰內地發展，主要做商演活動及直播帶貨搵真銀，已移居杭州嘅佢仲不時拍片分享生活日常。最近，郭少芸就跟隨一班工作人員回港，今次行程亦有拍Vlog；其中一段影片就以「54歲TVB單身女演員香港逛吃VLOG」為題，記錄佢到尖沙咀閒逛嘅行程，寫道：「回香港的第一件事！去尖沙咀吃吃喝喝，然后再逛逛」，不過唔知係咪無返香港太耐，郭少芸就連地鐵入閘都唔識。

郭少芸表示自己真係好耐無坐地鐵；過程中，佢就擺咗勁多次烏龍，就連佢自己都忍唔住尷尬笑。首先於自動售票機買飛後，估計分唔清尖沙咀站同尖東站，搞到要補多張飛；入閘時又要講普通話嘅工作人員提醒拍卡位置，就連要手推閘機都唔知道，工作人員再三提醒後，郭少芸就表示：「不是自動的嗎？」，非常搞笑。經過一輪烏龍行為先去到九龍城食泰國菜及藥房掃貨。

對於唔識手推閘機入閘，有網民留言指：「有沒有可能在杭州久了，杭州的地鐵是主動門」郭少芸則回應：「確實很尷尬」。有網民表示香港搭地鐵明明可以用八達通，留言詢問郭少芸點解唔用八達通：「你是香港人 為什麼還要買單程票啊，不是每個香港人都有八達通嗎」郭少芸就回答：「我的八達通不小心留在杭州了」。又有一名網民向郭少芸「教路」，直言：「其實香港地鐵可以刷支付寶的乘車碼的～我作為一個內地人告知你」郭少芸亦指回港之後，支付寶用唔到。另外，有網民就對郭少芸經常強調自己54歲有意見：「我很喜歡郭少芸，賴姑，但是不要每次都可以提起54歲這個年齡，雖然你們覺得主打一個年齡不設定，但是講一兩次還可以，多了就會反效果了」。至於網民亦有意見，表示郭少芸拍片濾鏡超強，又指佢唔識用八達通及坐地鐵呢個行為似乎有啲做多咗：「做場戲啫，不如話自己唔識講廣東話啦！」、「搭地鐵咋wo 又唔係搭火箭」、「太作狀了」及「幾廿年前呢款閘已經係轉架啦」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！