雅虎香港新聞 郭炳江談獄中感受：自疚、失望、氣餒、擔心 問自己點解搞成咁，但無怨恨
新鴻基地產前聯席主席郭炳江，在許仕仁貪污案中被囚5年，今天刑滿出獄。郭炳江被問到會否回新地工作時說：「我唔會，暫時無諗到呢樣嘢，我想抖下先。」
郭炳江又抒發他在獄中的感受：「我無怨恨。在這4年時間，乜嘢情緒都有，好多時會自疚、好多時會好失望、好掛住屋企人，會問自己點解搞成咁。好多問題、好多情緒要克服，我覺得入面係一個掙扎，唔係容易過的日子，但係神同我一齊行的時候，去到尾，我感到祂的恩典，有平安喺度。」
郭炳江早上9時許，在三名懲教處人員陪同下步出赤柱監獄，其胞弟郭炳聯、兒子郭基煇及女兒郭曉妍到場迎接。新地公關帶了麵包及飲品派給記者。身穿西裝、結上橙色領帶、一頭白髮的郭炳江，離開監獄範圍後，先跟女兒擁抱，其後和兒子及弟弟相擁。郭炳江先說：「好多謝大家今日來到，我今日心情好特別、好興奮，昨晚我真係瞓唔到。感謝我的神、主耶穌基督，在40個月於監獄陪伴我，同我一齊行過那條路。雖然好辛苦，好多時好氣餒、有時好擔心、有時好自疚，會有不同的感覺，神都在支持我。」
「我亦趁此機會，感謝我屋企人，同埋郭炳聯，我媽咪對我哋嘅支持。佢睇住我屋企，我好感謝郭炳聯。郭曉妍我個女，成日寫信俾我、鼓勵我，話俾我聽兩個孫發生甚麼事、讀書點，我好感激。」
「我亦趁這個機會，好感謝我的朋友、同事，同埋我有兩個好好的牧師，係監獄陪住我，每個禮拜來探我，又幫助我、輔導我，我好多謝朋友對我的支持，對我家人這7年來的支持。多謝郭基煇，我唔係到時，佢做咗我嘅工作，睇嚟今日嘅新鴻基真係做得好好。」
被問到最想做甚麼，郭炳江說：「返屋企，我訂咗點心食，（郭基煇：我們有蛋撻、凍咖啡等緊你Daddy）、（郭曉妍：有菠蘿包）菠蘿包？減肥啊。」返屋企第一件事做乜？「梗係攬住我老婆先啦。」同佢講乜？「對唔住啦。」會否見媽咪郭老太？「梗係會啦，今日。」有記者提到其已故胞兄郭炳湘時，郭炳江指：「我會拜佢，佢在我媽咪屋企。」
被問到會否回新地工作， 郭炳江指：「我唔會，暫時無諗到呢樣嘢，我想抖下先。離開公司4年，我覺得有好多變化，我想真係去學、係呢9個月內要追番上，睇個市場發生乜嘢，世界和香港社會發生乜嘢變化，想去多些其他國家參考別人做得好的，同埋最新科技對我們有何影響，如何善用科技做我們的業務。我相信我有好多嘢要學，有好多嘢要追上。我讀了書4年，要讀多9個月起碼。」
郭炳江又談及獄中生活，指有慣性程序，幾乎每日一樣：早上6時半起床祈禱一小時、7時45分吃早餐，之後會寫神學論文或做些工作。他說，很高興離開監獄，可以為社會及他人福祉做些事。在獄中克服負面感受的方法，就是不斷祈禱及看《聖經》。
「我會告誡年青人，真係守法律、唔好亂做嘢，一入監獄，佢哋就會好後悔。千祈唔好做衝動嘅嘢。」
前政務司長許仕仁貪污案中，許仕仁、郭炳江、陳鉅源（新地執行董事）、關雄生（港交所前高級副總裁）被判罪成，分別被判監7.5年、5年、6年、5年。目前只有許仕仁仍有服刑，料於明年出獄。
觀看原文： 按此連結
