鄭佩佩外籍新抱產子7個月後患乳癌第4期 發起眾籌募集醫藥費

曾拍攝《卧虎藏龍》嘅六十年代華語影壇女俠鄭佩佩，同前夫育有4名子女，2名女兒原麗淇同原子鏸都先後喺幕前發展，而孻仔原和玉就成為製作人及健體教練，去年更榮升爸爸，佢嘅外籍太太Andrea為佢誕下一子，而家囝囝Kai 已經7個月大。

喺美國生活嘅原和玉日前喺個人IG發文，表示太太患上乳癌，更貼上Andrea為兒子餵哺母乳嘅照片，原來影相之時係Andrea最後一次餵Kai ，因為之後Andrea要展開癌症療程。Andrea比原定早咗一年有多停止餵母乳，但多得其他有心媽媽幫助，為Kai提供母乳。

原和玉同Andrea喺IG不時分享運動照，但估唔到Andrea會發現患癌，令二人有如晴天霹靂。原和玉嘅帖文提到，身邊越來越多人患癌，而且日漸年輕化，佢歸咎於大企業製造嘅有毒環境。

而Andrea家人喺眾籌網站開設專頁，為Andrea籌募醫藥費，目標為5萬美元，到截稿時已經籌得接近4萬美元。眾籌專頁提到，Andrea去年誕下Kai不久就發現乳房有硬塊，並不斷增生，到感恩節經醫生確診為癌症，現時已經係乳癌第4期，並開始擴散到淋巴。Andrea現時以中西醫結合方法治療，而原和玉同Andrea由於係獨立工作者，並冇醫療保障，因此需要眾籌紓緩財政壓力。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！