野外步出2｜方紹聰繼續艷福無邊 與25位「女神」上山下海 難忘與關嘉敏、波波合作

由方紹聰（奶仔）主持嘅TVB節目《野外步出》於今年一月喺J2台播出，集結多位女藝人行山與訪談內容，深受觀眾歡迎，故此TVB添食開拍《野外步出2》，並喺11月1日開播，成為打頭陣嘅綜藝節目。

第二輯《野外步出2》共19集，方紹聰依然艷福無邊，陣容比第一輯更鼎盛，請嚟25位「女神」驚喜亮相，包括江嘉敏、鄧伊婷、傅嘉莉、林凱恩、彭慧中、陳詩欣、謝芷倫、蔡嘉欣、關嘉敏、黃婧靈（波波）等等，就連唔係TVB藝人嘅李靜儀（Heidi）都係嘉賓之一。方紹聰表示《野外步出2》監製一向畀好大自由佢，節目內容都係由自己同幕後團隊諗出嚟，而女嘉賓方面佢就話只要中意野外探險嘅女仔都適合，不過未必個個都會應承：「始終啲活動太刺激，未必個個頂得順，頂唔順嗰啲已經推咗我，所以嚟得參加呢個節目嘅，全部都係女戰士！」

咁多女嘉賓嚟講，方紹聰就表示同關嘉敏、波波嗰集比較深刻，方紹聰話係因為之前同關嘉敏喺《盛舞者》TX Crew隊友，相處好自然舒服，加上平時大家工作好忙，好難得可以一齊玩一日；而波波就需要扮「美人魚」，波波更表示除咗食飯，幾乎冇離開過泳池：「雖然用足兩支防曬，但最後都曬傷咗。依家過咗個幾月，啲曬痕仲喺度，着Bra壓落去依然好痛！」睇嚟又好玩又辛苦。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！