金宵大廈2｜伍樂怡家底豐厚 無意承接內衣王國家族生意 由零做起創業擁兩盤生意

TVB劇集《金宵大廈2》第八單元「吃播」已於前日（25日）播映完畢，伍樂怡（Kelly）於劇中飾演阿甘（丁子朗飾）女朋友Suki，伍樂怡以居家造型出場，大晒長腿，再次被網民激讚GFable。29歲嘅伍樂怡參加2017年香港小姐入行，當年大熱倒灶，五強止步，並輸畀雷莊𠒇、何依婷、黃瑋琦，大量網民替佢不值，封為「民選港姐」；其實伍樂怡除咗有樣有身材，亦擁有強勁家底，不過靠自己搞生意及默默耕耘做好演員工作。

「吃播」單元講述阿甘與彈彈珠（阮兒飾）、湯貴祥（白彪飾）尋找吃播主Jessica F（蔡嘉欣飾）事情真相，過程中白彪與伍樂怡失蹤，阮兒成為遊戲設計師並突然指出所有都係佢設計嚟嘅新遊戲內容；經過一段時間後，伍樂怡返到阿甘身旁並勸告阿甘放棄追查，劇情最後以伍樂怡向丁子朗講出「我愛你」後就用布捂住對方口鼻作結尾，伍樂怡表示角色嘅轉變令佢自己都感到有少少心寒。過往伍樂怡嘅演出亦引起唔同關注，例如係《3日2夜》主持、《星空下的仁醫》出演護士Bobo等等；當中喺《青春不要臉》中飾演妍妹一角除咗神還原《神雕俠侶》小龍女李若彤、與湯鎮業隔空對戲夠自然之外，臨離開香港到茶餐廳食蛋治嘅一場落淚戲都被激讚演活離愁別緒。

伍樂怡爸爸Johnson Ng和大哥於內地做女性內衣生意，據悉每年營業額約500萬美金（約3,923萬港元），家底相當富裕。不過，伍樂怡無意承接家族生意，反而選擇自己搞生意，2019年投資逾10萬成立滑水衣品牌，仲親自擔任模特兒影宣傳照；去年又同哥哥合資開設健康Bagel網店，由食譜研發、包裝設計、營銷等都親自負責，絕對唔係假手於人。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！