金宵大廈2｜恐怖氣氛網民睇得投入 鄭子誠于洋精彩演出獲讚好戲

《金宵大廈》喺2019年播出時掀起追劇熱潮，更被網民捧為「神劇」。之後無綫宣布原班人馬添食開拍續集《金宵大廈2》，今輯故事大玩「平行時空」，主角李施嬅及陳山聰一人分飾三角，再度上演一場活喺平行時空下既戀愛。劇集喺星期一（4日）首播，劇集一共有10個單元，即係兩集為一個單元。首個單元故事「七樓半」已經播出，劇情懸疑又緊湊，以下就同大家睇下網民對《金宵大廈2》嘅反應啦！

成功營造恐怖氣氛
《金宵大廈2》係關於另一個時空嘅金宵大廈內所發生嘅事，頭兩晚播出單元故事「七樓半」，劇情主要講述陳生力（于洋飾）與三名朋友以長命契方式買入一個單位，朋友逐一離世，只係剩下佢同一個朋友，。不過可惜鍾意飲珍珠奶茶嘅阿爺意外被鋼質飲管插死，仲成為詐屍。阿仔（鄭子誠飾）同阿孫（曾展望飾）為單位嘅業權而不顧親情，刻意隱瞞阿爺已經死去。之後，Ella（李施嬅飾）意外揭破秘密，阿仔欲下毒手殺死Ella，而Ella成功被Maurice（陳山聰飾）救走。阿仔同阿孫返回骨灰場，不過發生離奇嘅「人體自燃事件」，二人與阿爺齊齊被燒死。唔少網民睇完都大讚恐怖同精彩，紛紛留言激讚，例如「個氣氛好恐怖」、「節奏慢咗D，不過氣氛真係唔錯，希望唔好眼高手低啦」、「套野轉哂風格又幾過癮喎 難得無線肯搏」、「成套氣氛好恐怖呀」、「第一集已經好懸疑好好睇」、「第一集幾有懸疑氣氛，希望會收得....」、「好耐冇睇CCTVB戲睇到有啲緊張窒息感」、「好正，依啲先係劇」、「呢套劇好掂，拍得好有電影感！」及「睇落聽落都幾恐怖，但好好睇」等等。

配角表現突出
頭兩集單元故事「七樓半」圍繞于洋、鄭子誠及曾展望三爺孫，三人為咗個單位各懷鬼胎，唔少網民都話有鄭子誠當然有陰謀及大讚佢哋演技出色，例如「于洋做得好正」、「gm好靚仔」、「于洋真係好正」、「陰謀情人堅好戲」、「鄭子誠真係好好戲」、「愛回家mike意外地交到戲」、「鄭子誠真係好戲」及「鄭子誠果然一定有陰謀​​」等等。另外，于洋喺劇中意外被鋼質飲管插死，而呢個眼球被飲管插住嘅造型非常迫真，唔少網民都話好恐怖，當中包括「以後唔敢飲珍珠奶茶啦」及「一嚟就咁激, 咁驚嚇」，甚至有網民話媽媽被被畫面嚇親兼熄電視。

李施嬅keep得好好
現年41歲嘅李施嬅有樣有演技，唔少網民睇完《金宵大廈2》後都大讚佢保養得宜、好靚同好演技，例如「李施嬅原來41歲，都算keep得好」、「李施嬅都保養得幾好。佢同山聰係有情侶feel.」、「都幾好睇，忽然之間覺得李C好正。」、「李施嬅雖然過40但都幾正 keep得好好」、「C wa幾令女」、「李Ｃ演戲有戲味。」、「施嬅演戲真係好自然。可惜已經無咩拍劇。」、「TVB應該頒個視后俾李施嬅！ 佢個演技真係掂！」、「LEE SZE WAH 靚到​​」、「Selena同山聰演技好得啊。」及「精神女醫生把聲好有戲 有Coco姐嘅感覺」等等。

靚寶好搶眼
除咗演員之外，劇中嘅黑貓「靚寶」亦繼續成為焦點，靚寶精靈可愛、再加上圓碌碌嘅眼睛，成功俘虜一眾網民。今輯繼續有佢嘅出現就會有離奇事件發生，好似佢出場冇幾耐阿爺就死亡，唔少網民大讚靚寶識做戲，例如「隻黑貓好CUTE」、「最佳貓配角，跳上櫃頂再做表情。」、「靚寶呢下對眼識做戲」、「靚寶演技好好 可愛又恐怖」、「靚寶對眼又圓又大，識做戲。」及「我覺得隻貓好可愛」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！