鍾鎮濤34歲大仔鍾嘉浚分手後有新對象 出post問網民「係咪要一齊？」

鍾鎮濤同前妻章小蕙有一對仔女，大仔鍾嘉浚已經34歲，近年喺香港美國兩邊飛，媽咪章小蕙大爆個仔而家開咗間動漫主題cafe，試過自己落手洗廁所，凌晨4點先收工。事業以外，鍾嘉浚本來有位拍拖2年嘅女友，仲試過一齊開補習社，女友負責教班，二人仲不時放閃。

不過早排鍾嘉浚喺IG自爆同女友大約一個月前分手，而且係佢喺外地工作期間被女方say goodbye！鍾嘉浚發文話為分手感到沮喪，但係呢次經歷令佢更堅強，而且靠食嘢同打機面對。

之後鍾嘉浚又post咗同一位長髮美女嘅合照，指對方喺佢感覺好差嘅時候陪伴，兩個人一齊食咗唔少好嘢。鍾嘉浚直言而家單身，會搵一位願意同佢一齊喺美國洛杉磯生活，而且好似隊友嘅對象﹐甚至寫道係咪要同長髮美女一齊。鍾嘉浚喺留言透露長髮靚女係朋友，識咗6年，而網民就留言鼓勵鍾嘉浚「去馬」。

鍾鎮濤2014年同多年女友范姜素貞結婚，阿B同范姜育有兩女鍾懿及鍾幗，鍾嘉浚對2個同父異母妹妹關係唔錯。而20歲嘅鍾懿盡得爸爸鍾鎮濤音樂天份，更加現身爸爸有份嘅溫拿演唱會上演出，今年6月鍾懿喺內地音樂節正式出道。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！