Meme圖「握拳寶寶」18歲近照曝光 萌爆嬰兒變長髮型男 憑網路名氣成功挽救爸爸生命

Meme圖「握拳寶寶」極受歡迎，一名嬰兒用力擺出閉嘴表情，以及右手握拳，非常可愛，至今仍非常多人沿用，該嬰兒嘅媽媽上周就喺社交平台分享其近照；當年萌爆嘅嬰兒已經18歲，變成一名長髮型男。

「握拳寶寶」本名為Sammy Griner，Sammy媽媽於社交平台PO出囝囝嘅近照，表示囝囝啱啱過咗18歲生日：「My baby boy turned 18 yesterday，Happy birthday Sam」，從照片睇到，Sammy Griner留有一頭中長髮及鬍鬚，濃眉大眼、笑容靦腆，唔少網民都留言祝福佢生日快樂，仲有網民貼出其「握拳寶寶」Meme圖。

其Meme圖「握拳寶寶」其實係喺Sammy Griner仲係11個月大嘅時候，媽媽帶佢去海邊玩嗰陣留影，當時媽媽純粹覺得好得意就上傳到網上，無諗過會爆紅。雖然Sammy Griner曾透露喺長大過程中，有好多人要求佢做握拳動作令佢感困擾，但佢就曾憑網路名氣為父親成功籌集腎臟移植手術嘅費用。Sammy Griner爸爸於2006年患病，2009年腎衰竭，移植手術係挽救生命嘅唯一方法。健康保險已支付部分治療費用，但家族需要額外嘅現金支付手術費用和護理費用；後來，家族展開募款活動，於一周內，已募得超過93,000美元（約722,123港元）嘅捐款。起初，Sammy Griner媽媽對於利用兒子嘅網路名氣籌集費用抱懷疑態度，但諗到可能得呢個方法幫到手，所以決定嘗試，而Sammy Griner爸爸接受手術治療後亦已恢復健康。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！