關嘉敏捱過8毫子收入低潮期 加入邵氏狂吸金卻慳妹上身買平衫

舊年因為參加ViuTV選秀節目《全民造星III》而彈起嘅關嘉敏（Carman），原本係女子組合Bingo隊長同時又係一名模特兒，雖然20強入10強時止步，但擅長載歌載舞嘅佢仍吸納咗一班支持者。不過，近日關嘉敏就宣佈已簽約邵氏，而TVB官方網頁檔案亦可見到佢嘅資料，網民直斥佢反骨，仲話要unfollow佢。

接受媒體訪問嗰陣，關嘉敏就話ViuTV無同佢洽談合約，並指自己話唔到事並尊重經理人公司幫佢做嘅決定，而緋聞男友CY亦物色緊經理人。對於網民聲討，關嘉敏直言唔開心：「覺得分開咁睇唔係唔好，但點解我喺《全民造星III》做得好你哋會支持，但當我去到另一個台，你哋會覺得我好差，呢樣嘢令我最唔開心，好似抹煞咗我嘅努力。」

關嘉敏未參選《全民造星III》、初入行嗰陣曾收過8亳子糧單，關嘉敏仲表示阿爸講笑氹佢話「畀多兩毫子湊夠1蚊」，此事令關嘉敏感到好內疚，反問自己點解入行前可以畀到家用，但入行後反而令屋企人更擔心。

雖然喺入行前儲下一筆6位數字「追夢基金」，但關嘉敏曾表示唔知要支撐到幾時，所以嗰段時間好怕洗錢。雖然近月關嘉敏工作量大增，亦曾自爆狂賺6位數字，不過曾經就有傳媒影到佢去旺角買平Bra，近日又被影到同昔日戰友Odi相約下午茶後到日本平價服飾品牌店舖掃貨，幾對襪加埋打底背心$500有找，之後就坐巴士離開，相當慳家。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！