關楚耀送兩疊1千蚊銀紙俾女友 被網民指老土：十足土豪 娘爆

早幾日嘅情人節就係情侶們攞正牌放閃嘅日子，唔少男士都會送花俾另一半以表心意。唔知關楚耀（Kelvin）係唔係覺得送花唔夠特別，佢竟然選擇大手筆送兩大疊1千蚊銀紙（目測至少20萬）俾拍拖5年嘅網紅空姐女友Joann，而女友就晒命咁將呢份禮物嘅相片放上IG Story，唔少網民認為關楚耀喺度炫富，感覺老土。

喺情人節當日，Joann上載咗兩個IG Story，第一個就係佢手持台式奶茶嘅相片，並寫上「今日個天同我心情一樣咁靚」，而第二個就係佢拎住兩大疊1千蚊銀紙嘅相片，並寫上「Waaaaa 諗住簡簡單單食餐飯 佢突然拎個信封出嚟 “情人節快樂” 我以為佢寫咗一疊情信」、「任何玫瑰花都不及任你花 隨便花」及「錫女朋友的男人會發達」。

唔少網民認為關楚耀喺度炫富及感覺老土，留言話：「變成現金咁樣比人真係大陸土豪先會」、「正常人唔會比現錢啦」、「點解成件事覺得娘左，又唔溫馨」、「十足土豪, 娘爆」、「行為好肉酸….」、「又老土，又無誠意，論多又唔係，有咩好曬？不懂欣賞....」及「俗氣到一個點」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！