陳啟泰重啟亞視經典《百萬富翁》 問題簡單騎呢 網民：點忍住唔笑場？

亞視節目《百萬富翁》當年播出時成為城中熱話，主持陳啟泰亦因而躍升成「亞視一哥」。陳啟泰近年主力內地發展，對上一次參演香港劇集已經係2020年ViuTV劇集《黑市》；不過，佢積極於內地社交平台拍片。日前，陳啟泰將經典節目《百萬富翁》重現，但就貫徹一向搞笑視頻嘅風格，將問題變得極搞笑，就連網民都笑指點解陳啟泰忍到笑。

影片中，陳啟泰穿上一身黑色西裝以《我和殭屍有個約會》「山本一夫」造型於熟食檔展開《百萬富翁》，問題相當簡單，更可以致電家庭觀眾，包括：「一斤等於幾兩？A：一百兩、B：半斤百兩、C：十兩、D：2兩」、「金庸印象最深刻是？A：郭靖、B：黃蓉、C：小龍女、D：尹光」。網民紛紛留言表示好懷念《百萬富翁》：「真心好希望重啟百萬富翁」、「想當年嗰句Slogan：眾望所歸，無得留低」、「以前非常喜歡看百萬富翁」、「好好笑，如何可以忍住不笑場」、「哇，我哋嘅童年回憶啊」、「回憶殺」等等。又有網民指59歲陳啟泰都係咁靚仔，但都有網民指陳啟泰發福不少及眼角下垂。

陳啟泰曾主持TVB節目《香港早晨》，出演《新紮師兄續集》、《我本善良》等劇集。1998年過檔亞洲電視拍攝《我和殭屍有個約會》演技獲關注，再被高層睇中擔任《百萬富翁》主持，陳啟泰曾經笑指覺得當時高層揀佢係因為自己夠木獨。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！