陳彥行被驚爆有個3歲女讀緊名牌幼稚園 47歲自稱單身多年 囡囡父親是誰？

今日有傳媒收到報料，指47歲嘅陳彥行（行姐）有個3歲女兒，並且喺港島區一間名牌幼稚園就讀。據報導指，行姐疑似囡囡就讀幼稚園小組班剛剛畢業，而行姐未有因為圈中人身份而有所避忌，反而不時參加校內活動，對「囡囡」照顧周到。根據資料，行姐被爆疑似囡囡入讀嘅幼稚園，每年學費接近11萬，係大學學費2倍有多。而行姐近年睇落比前圓潤，令傳聞更加似層層。

陳彥行90年代中期加入TVB，後來成為力捧小花之一，與傅明憲、曹眾、彭子晴及姚瑩瑩被大台以「五美圖」包裝，同同期古巨基、古天樂、吳家樂、劉愷威及合遠恆嘅「新五虎」一齊力谷上位。

身材出眾嘅行姐後來不時以性感形象示人，但向來緋聞唔多，最多只係同《皆大歡喜》嘅拍檔鄧兆尊傳出戀情，但多年後行姐受訪時表示對兆尊冇感覺。而早年有傳媒曾經影到陳彥行同一位送貨男過從甚密，甚至指行姐唔介意雙方身份差距，更不時供養男友，但因為送貨男花心令行姐斬纜分手。不過陳彥行解釋送貨男係佢中學同學。

陳彥行多年來自稱單身，亦曾經自爆得到好友苑瓊丹幫手做媒人介紹筍盤，但似乎冇咩下文。近年行姐幕前工作量唔算多，假如爆料屬實，又真係冇咩機會見到3年前嘅佢腹大便便。而喺2021年底，陳彥行接受《東張西望》訪問，透露母親懷疑受銀行職員誤導簽下3000萬元保單，後來喺各方達成共識下行姐得到滿意嘅賠償。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！