陳瀅着4條打底 守住個衩

陳瀅早前為台慶劇宣傳時走光，昨日再以性感高衩裙出席活動時顯得小心翼翼，笑言着了4條打底，又黐膠紙防走光，確保萬無一失！

陳瀅昨日穿上低胸高衩裙在尖沙咀Mira Place出席《Let's Gala This Christmas》開幕儀式，早前為台慶劇《美麗戰場》宣傳時不慎走光的她，今次再作性感打扮格外小心，走動時按實開衩位置，嚴防重蹈覆轍！她笑說：「仲唔驚呀？着咗4條打底，仲黐埋膠紙，女仔走光唔係咁好，上次係有少少失手，掛住拖劉佩玥囉！」

談及劇集《新四十二章》再度改期，未能趕及於台慶頒獎禮前播出，以致少了龔嘉欣這個視后勁敵，陳瀅說：「唔清楚，劇集播放檔期成日都改，好似《痞子英雄》本來都唔係嗰個時間播出，但唔會少咗個對手，因為頒獎禮好多人參加。我最有信心攞最佳衣着獎，一向注重時裝，冧莊就最威！」

聖誕遊埠驚發福

聖誕節她將返溫哥華探親，順道到日本旅行，1月才返港出席台慶頒獎禮，其後有機會開拍兩套劇集，包括《痞子殿下2》。她透露還未為台慶及頒獎禮準備戰衣，笑言返港後可能增磅，到時再揀衫。此外，她透露讀書時期會參加聖誕舞會識男仔，問今次返溫哥華可會去派對結識異性？她笑說：「都係見番啲舊同學，同埋溫哥華都冇靚仔，家姐話會帶我去拉斯維加斯玩，睇吓識唔識到鬼仔啦！不過都係講吓笑，我都傳統，鍾意中國人。」