陳詩欣錫燶筍盤男友 買生蠔進補

東方日報
·2 分鐘文章
陳詩欣買完生蠔即前往揀酒,好識搞氣氛。
陳詩欣買完生蠔即前往揀酒,好識搞氣氛。

憑《3日2夜》彈起成為「一件頭女神」的陳詩欣,近年可謂「逆市奇葩」,多主持工作之餘又有廣告拍,年屆28歲適婚之齡,加上身邊有位拍拖2年的筍盤男友,當然一得閒就要好好錫住對方。日前見她狂掃半打被喻為「男人之寶」的生蠔,似乎準備與另一半開大餐!

陳詩欣憑主持娛樂新聞台、《姊妹淘》及《學是學非》成功入屋,多得「是非精」效應,帶挈她逆市下頻頻接Job,去年底更接了個銀行保險廣告,收入大增!所謂「工欲善其事、必先利其器」,要Keep住事業運,必先保住個靚樣。日前見她現身中環揀化妝品,對粉底、唇膏、眼影等統統大感興趣,逐樣試上手,更忍不住除口罩拼上面試色,然後又秒速戴回,以策安全,不過似乎不合心水,未有斬獲。

邊煲粥邊Shopping

之後她轉場逛超市,雖然正值收工人多的繁忙時間,但無阻其Shopping之心。目標明確的她一支箭衝入海鮮區,睇中蟹箝再掃生蠔,問過職員意見後即埋單走人,未知是否買生蠔為男友「補身」!其後她轉往睇酒,再去買意粉醬,期間邊揀邊打電話,似與男友隔空商量,行足半個鐘後,才拿着戰利品急急腳回家「餵飽」男友。

記者事後致電詩欣,問到買生蠔一事,她笑言之前工作忙碌,故想食餐好獎勵自己,又表示買了6隻與家人共享,每人差不多只分得1隻。至於睇化妝品,她解釋開了網上頻道拍片教扮靚,每月花3分之1收入買化妝品,男友亦有給予意見。