隱形戰隊丨歐瑞偉與陳展鵬對打慘死 原來俾監製文偉鴻殺過7次

TVB劇集《隱形戰隊》自播出以來話題不斷，有唔少驚險槍戰場面及性感畫面大灑鹽花，成功吸引唔少觀眾追看。唔經唔覺劇集將於今晚（14日）播出大結局，最新劇情就講到張Sir（歐瑞偉飾）為咗拯救可以幫助Madam Fong（江美儀飾）脫罪嘅「證人」，而同匡勝天（陳展鵬飾）單對單激戰，不過最後手槍冇子彈。張Sir唯有用槍柄與拎住刀嘅匡勝天打鬥，可惜張Sir突然眼疾發作，令原本佔上風嘅佢被匡勝天兩度刺中要害，最終重傷不治。

龍虎武師出身嘅歐瑞偉，雖然已經61歲，不過依然身手了得及體力驚人，佢喺接受傳媒訪問時就謙虛指一切嘅效果全靠武術指導幫忙設計招式，同埋監製文偉鴻（Jazz）控制整個節奏及流程，而佢自己就只要負責做好心理準備，因為拍Jazz嘅戲都知道要埋身肉搏，冇得揸流攤，全部都好認真去做。另外，佢仲話當時同時兼顧《隱形戰隊》及《愛·回家之開心速遞》嘅拍攝工作，雖然係有少少辛苦，不過仍然好開心可以參與其中，同埋再一次同Jazz合作。

歐瑞偉喺《隱形戰隊》飾演嘅總警司張Sir係一個大好人，所以佢嘅慘死令唔少網民戥佢心痛，更有網民喺討論區留言問：「文偉鴻殺咗幾多次KC？」，結果引嚟本尊現身，兼喺IG上載截圖回應話：「使徒行者、使徒行者 諜影行動、城寨、同盟、鐵拳、超能、隱形，一共7次」，除咗劉佩玥及孫慧雪以笑表情符號回應之外，林子善亦有搞笑留言話：「大家都知道！文偉鴻最愛歐瑞偉，呢啲叫做愛死佢」。另外，呢個PO仲吸引唔少網民留言，例如「好彩冇份跟愛回家」、「準備第八次未」、「其實編劇先係主謀」、「係啦！重要次次死得咁惨！」及「可不可以有一次饒他一命啊」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！