雲浩影3餐無憂 斥6位數造歌

東方日報
·3 分鐘文章
雲浩影終身包食米線,肯定唔會餓親。
雲浩影終身包食米線,肯定唔會餓親。

ViuTV選秀節目《全民造星III》參賽者雲浩影(Cloud)完賽後密密賺外快自資出歌,最近受邀擔任譚仔雲南米線最新湯底「香茜皮蛋魚湯米線配脆肉鯇」的產品代言人兼拍攝廣告,更可終身免費食米線,令同場嘉賓朱鑑然相當羨慕!

昨日Cloud跟朱鑑然、「譚仔姐姐」紅梅姐現身中環分店出席「雲遊芫茜世界」新產品發布會,自稱是「譚仔迷」的她話好開心,即場(R)終身免費食米線,豈料願望成真,令她興奮不已:「會同男朋友Share,今日可以盡情食。(最高紀錄食幾多碗?)我係計食辣而唔係食幾多碗,可以食到3小辣,想刺激啲就食2小辣,但只限叫外賣,因為堂食嘅話會食到流晒鼻涕。」需要學譚仔姐姐的特色譚仔口音?她笑言本身都識,可以同紅梅姐切磋。

之後Cloud透露快將推出新歌,以獨立音樂人身份自資6位數字:「將廣告啲收入拎晒去投資歌唱事業,要工作先可造到歌。」提及《造星III》多位同屆學員有好發展,甚至已簽公司,問到她可有眼紅他人?她直言沒有,因各人發展不一:「有公司同冇公司都係咁做,冇公司就好多嘢都要落手做,自己都希望學多少少嘢,如果將來有公司都知點做。」

朱鑑然被偉仔電親

朱鑑然得悉Cloud獲享終身免費食米線,即大表羨慕:「有呢個優惠真係好開心,大家平時努力工作都係為咗有3餐飽飯食。(想做咩代言?)最想代言手錶、汽車。」可會想同圈外女朋友以情侶檔姿態接代言?他即澄清現時是單身:「以前嗰個都話係了解中,依家專注事業先,假如我有女朋友都唔抗拒一齊搵錢。」隨即透露剛拍畢英皇電影《金手指》戲份,戲內跟影帝梁朝偉有大量對手戲︰「好緊張,我係做ICAC其中一員,所以有好多對手戲,喺佢身上學識專注。」更自爆被對方的電眼電親︰「有幾場對視戲,我承認係有1秒跳離咗個角色,真係好迷人!」

Cloud食好「茜」 朱鑑然有鋪癮

Cloud身為譚仔雲南米線最新湯底「香茜皮蛋魚湯米線配脆肉鯇」的產品代言人,當然獲優待率先試食。她自爆對譚仔非常着迷,更是芫茜控,1天可以食足3餐:「最開心可以加配芫茜山同皮蛋海,芫茜味好出、好香,好似打邊爐咁,同埋最鍾意啲魚冇骨!仲有試咗個凍香茜青檸雪碧,本身一睇到成杯綠色都驚驚哋,原來都幾好飲!」

讚有新鮮感

相反朱鑑然就不是芫茜控,不過都大讚新湯底有新鮮感︰「我未去到『控』咁誇張,但都鍾意食芫茜、香料,覺得味道好獨特,試過新產品,皮蛋可以下火,芫茜可以帶出魚湯嗰種鮮味,細個已經好鍾意食米粉、米線,有次去內地做嘢一排,個心都好掛住食譚仔,返嚟第一時間去食,原來真係會有呢鋪癮。」

朱鑑然十分尊重長輩,餵紅梅姐食好「茜」,認真抵讚。
朱鑑然十分尊重長輩,餵紅梅姐食好「茜」,認真抵讚。
雲浩影笑言懂「譚仔口音」,可以跟紅梅姐交流一下。
雲浩影笑言懂「譚仔口音」,可以跟紅梅姐交流一下。
雲浩影與朱鑑然對新湯底讚不絕口,一試難忘。
雲浩影與朱鑑然對新湯底讚不絕口,一試難忘。
朱鑑然笑言太怕醜,不敢找梁朝偉集郵。
朱鑑然笑言太怕醜,不敢找梁朝偉集郵。