【電影LOL】「戰狼」吳京又有國家級任務! 拍《金剛川》對抗美國撐北韓

·3 分鐘文章

內地電影《戰狼2》有句經典愛國台詞「當你在海外遭遇危險,不要放棄!請記住,在你身後,有一個強大的祖國!」,就係咁「愛」出56億人仔票房,男主角吳京打贏全世界之後仲打救埋宇宙,之後推出嘅《流浪地球》搵多46億票房!

不過官方心思真係好難猜度,本來係阿爺欽點愛國主旋律代表作,後續嘅《戰狼3》忽然又被官方以「不能宣揚戰爭,別把西方作為假想敵」為由不獲批文,《戰2》又被官方查賬,要補稅云云。

中國要咁用力監管影視內容,其實可以理解,因為觀眾似乎分唔清現實同電影嘅分別!3月時因為防止新冠疫情反彈,中國政府取消大量航班,結果做成大量中國人滯留海外不能回國,返唔到老家就走去吳京個微博留言,鬧爆佢套《戰狼2》大話連篇!將電影內容當成外交法律,內地觀眾有時都幾純品又天真。

不過因為呢件事,足見電影幾咁有影響力,所以阿爺又出手!針對近期中美大戰,搵嚟「戰狼」吳京呢位愛國代言人主演、《我和我的祖國》導演管虎、《流浪地球》導演郭帆、《綉春力》導演路陽聯合執導最新「抗美」電影《金剛川》!

《金剛川》據聞已經開機拍攝,故事圍繞半世紀前50年代初朝鮮半島戰爭中,中國人民志願軍參戰嘅一段抗美援朝歷史。暫時電影資料唔多,不過有傳中共下令《金》一定要喺人民志願軍抗美援朝70周年紀念日嘅10月25日上映。

「不能宣揚戰爭」、「唔可以視西方為假想敵」,但必需要重溫歷史所以要拍抗美戰爭電影,只可以講「戰狼」唔易做,吳京演藝事業隨時一日天堂一日地獄,呢一秒似乎又上返天堂。軍人形象深入民心嘅佢應該會繼續拍主旋律電影,有佢做打不死嘅軍人,《金》絕對有可能成為下一套「爆款」抗戰神片!

更多電影文章

【電影LOL】Marvel首套華人英雄主角電影《上氣》澳洲外景復工 楊紫瓊疑似有份?

【電影LOL】最強經典片庫 新串流平台Peacock 免費有得睇?

【電影LOL】NBA重新開鑼 睇《太空也入樽》點打逆境波

【電影LOL】高層揞一年人工出糧保下屬 荷李活金牌經理人公司撐唔住裁員止血

【電影LOL】美國攝製隊封城期間入武漢拍紀錄片 點解冇被官方阻撓? 原因係……