【電影LOL】《末日先鋒:戰甲飛車》前傳 Charlize Theron被飛因為扮唔到20歲?

·3 分鐘文章

全球電影業因為新冠疫情停擺,戲院無新戲上唯有推出特備節目救亡,所以呢期可以喺戲院睇返好多90年代港產片,包括周星馳嘅《逃學威龍》系列,又有得睇返Nolan執導嘅《蝙蝠俠》,仲有一定要喺大銀幕睇嘅《末日先鋒:戰甲飛車》!

《末日先鋒:戰甲飛車》係2015年作品,幾年前香港上映時票房唔差但又未至於好爆,外國評價相當高,影評網爛蕃茄有成97%新鮮度,仲得到11個奧斯卡提名,最後捧走6項技術大獎,成績相當驕人。全片沙漠飛馳絕無冷場,當時錯過咗嘅觀眾,絕對應該趁依家重映時入場睇返!

電影設定於荒蕪世界裡,水和能源資源都消耗殆盡,為了求生必須不擇手段。由Immortal Joe控制嘅世界甚為瘋狂,有一班視死如歸異常亢奮嘅白面戰男,又有死都要彈結他嘅紅衣男,再加一大班奇型怪狀嘅男歹角,女人則被當成乳牛同生仔工具!

世界再沒有法紀下,出現了兩個可能帶來新秩序的反抗分子。麥斯(湯夏迪 飾)消沉於慘痛往事,獨自流浪荒漠追尋平靜,想遠離人群偏偏人群追住佢,活捉後被當成血袋,直至與指揮官芙莉歐莎 (查理絲花朗 飾)為首的反叛者交鋒。芙莉歐莎一開始只想解救被困及被逼做Immortal Joe妻子嘅女人們,前往和平綠洲,最後聯手麥斯推翻專制狂暴的軍閥,重奪家園!

導演George Miller於訪問時提及已經構想好以芙莉歐莎(Furiosa)為首嘅前傳,查理絲花朗塑造嘅獨臂芙莉歐莎硬朗、有型又勇武,根本係《末日先鋒:戰甲飛車》嘅焦點所在。可惜近日導演確定,前傳無查理絲花朗份,芙莉歐莎將會另覓人選!

角色之所以要換人,唔係因為有咩過節、恩怨情仇,George Miller本來打算搵返查理絲花朗飾演女主角,然後用CGI特技執到佢變返20歲。不過導演睇完用咗同一特技處理嘅《愛爾蘭人》後決定打消念頭,仲話科技暫時仲有進步空間,未等到理想特效技術嘅佢,寧願cast過另一演員做芙莉歐莎。

查理絲花朗好榮幸有份創作芙莉歐莎呢個角色,對被飛起一事表示傷心,不過尊重導演決定。至於由邊位女演員接手演出年輕版芙莉歐莎就暫時未有定案。珠玉在前,要外型同演技都比得上查理絲花朗,難度相當高。最後邊個藝高人膽大接呢個角色嚟做,拭目以待。

更多電影文章

【電影LOL】0成本勇奪全美票房冠軍 呢套Unsubscribe原來係咁拍!

【電影LOL.外語930】逃亡教學指南 《Argo救參任務》

【電影LOL】今個星期睇咩戲 《幻愛》《無名勳章》《惡‧迴家》《緣來客運站》《這一刻,想見你》

【電影LOL】《幻愛》 談一場疑幻似真嘅愛情

【電影LOL】天之驕子變過街老鼠 竟然有人想拍《孫楊傳》?