福祿壽訓練學院終極對決 ｜關嘉敏演出獲好評 女扮男裝神還原譚輝智唱《屈到病》一幕

TVB節目《福祿壽訓練學院終極對決》於昨晚（6月30日）播出，早前扮過王菲的關嘉敏（Carman）女扮男裝，於節目中變身成「痰輝智」，演出《屈到輝智病了》。關嘉敏獲讚有扮嘢天份，成功神還原譚輝智。

譚輝智曾於《中年好聲音2》演唱經典洗腦歌《屈到病》時令觀眾留下印象，關嘉敏戴上假髮並「易容」，配以乸口乸面及扁嘴表情，再加上機械式僵硬舞步演出，增添一份喜感。同場亦加映「道具BB」和「面具拉姑」一同演出，令演出加分。

演出過後，關嘉敏獲三位評審一致好評，錢嘉樂笑指除高度外，基本上都與譚輝智似到十足。曾志偉好奇地問：「係邊個嘅智慧叫你扮譚輝智㗎？你幾時開始覺得自己似譚輝智？」阮兆祥表示要送上掌聲給TVB的梳化部同事。江美儀透露她特意向化妝間同事借「拉姑頭箍」來戴。最終關嘉敏的演出獲得7個10分，在相似度方面，三位評審均給她10分滿分，成績很好。作為跳唱歌手，關嘉敏坦言模仿初學者舞姿是整件事最高難度之處：「我揣摩咗好耐，我聽到最多評語，就係話我跳得太好，Carman你減番少少啦。」

關嘉敏回覆《Yahoo娛樂圈》：「其實我從尋晚開始都收到好多Message話好似，我真係好開心，冇諗過岀到嚟嘅效果、反應會咁好，好多謝有睇同投我一票嘅人，我覺得已經係袋咗好多嘢落袋。我問思捷扮譚輝智有幾多分，佢都係畀100分我，我覺得我喺呢個決賽已經係無撼，雖然係贏唔到，差3分已經好好，作為一個扮嘢嘅新手嚟講。我都好滿意今次嘅表現，希望下次可以再開發多啲唔同嘅嘢。最開心係呢個節目令我嘅可塑性高咗，原來我都可以扮嘢，呢個係諗都冇諗過，成就解鎖。」

談到之前扮王菲，她說：「王菲嘅演出我都係非常鍾意，因為呢個比賽之後入咗十強，都會驚打破唔到王菲呢個位，當時岀咗嚟之後個個都話好似，都苦惱緊十強有冇咩表演可以比王菲好。最大嘅對手唔係十強，係真係自己對手。所以我覺得我已經打破咗自己喇，好開心啊。」

她感慨道：「其實都好好彩我參加咗《福祿壽訓練學院》，初初覺得唔係好啱我參加，因為未試過，起碼叫做試吓玩吓。第一次扮允光嘅心態就係玩吓啦，得就得唔得就唔得，愈玩就覺得愈要做好啲，開始慢慢去進步，每Round都袋咗好多唔同嘅嘢落袋，當中當然有好大嘅壓力，去到後來上到台，就Enjoy同觀眾玩，同令觀眾心情變得更加好，我都有份好開心嘅感覺，你哋開心，我又開心，我覺得係表演者最大嘅收穫嚟。多謝呢個節目同多謝李思捷，『一日為師，終身為師』，我真係覺得佢好勁，佢可以睇到我哋睇唔到嘅嘢同發掘岀嚟，真係好多謝佢！」

對於未來，她表示：「我想再有多啲唔同嘅成就解鎖，我本身係一個唔鍾意局限自己喺個框框度嘅人，我想做一個全能嘅藝人，除咗唱歌、跳舞、扮嘢或搞笑，我想全部都識，令人覺得關嘉敏係有實力，唔係流㗎！」