王宗堯太太獨力經營小食店疑業務起變化「希望爭取時間多啲見大家」業務夥伴停業或有牽連

藝人王宗堯年初因2019年七一衝擊立法會案被控暴動罪成立，三月中被判囚6年2個月。王宗堯喺案件審訊期間，同太太Julia去年10月喺太子開設小食店，現時Julia主力打理鋪頭生意。而Julia尋日就喺IG post出一張王宗堯仍然喺鋪頭開工嘅相片，並發文寫道「短短幾個月，原來都可以令到好多人嘅人生截然不同。關於業務去向，請容許我稍後再正式向大家公布，畢竟事發太突然我都需要時間消化同埋盡量妥善處理好一切。呢幾日我都會落舖幫手，希望爭取時間多啲見到大家啦」，言詞之間似乎暗示小食店經營出現變化，唔少網民都留言打氣。

而同王宗堯夫婦小食店合作多時嘅食肆友利冰室，近期被指拖欠店鋪租金、員工薪水以及強積金供款，甚至傳出東主走數離港嘅消息。友利嘅員工尋日發文指，「太子及荔枝角分店物資已耗盡，無法繼續如常運作，所以兩間分店於即日(6月29日)開始暫停營業，直至另行通知。散聚有時，感謝支持，江湖再見 友利店員字」」。王宗堯太太Julia私人IG都有轉發友利呢篇帖文，並且寫道「我諗…我都應該好快就可以真正放一個假了」。

王宗堯夫婦喺太子嘅小食店位置，正係友利太子店旁邊，早前2間食肆更合作賣糉，於是有網友想知友利有冇將賣糉收入俾返Julia佢地。而Julia 尋日post出嘅照片中，唔止見到王宗堯，友利老闆「爆炸頭」都喺相入面，當時各人仲有講有笑。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！