【電影LOL】楊千嬅出紀錄片回顧人生 呢班巨星嘅紀錄片講奮鬥史講埋政治
近年唔少歌手推出紀錄片,通常分兩類,一係紀念已故歌手,將佢演藝生涯重要片段剪輯配以身邊人憶述與主角共事生活嘅點滴,好似《雲妮侯斯頓:永恆的天后》或者《Aretha Franklin: 騷靈恩典》。
另一款係演唱會電影,將演唱會表演片段加幕後籌備、排演過程,側寫出佢地嘅音樂成就,好似即將上映、全球極受歡迎南韓男團BTS嘅Break The Silence: The Movie。BTS打破言語界限,多次登上美國Billboard及多國音樂排行榜第一名,Break The Silence: The Movie集演唱會結集幕後花絮、成員訪問,用音樂將南韓帶到全世界。
仲有10月14日於Netflix上架,韓流女團Blackpink嘅Light Up the Sky,講述4位女生由練習生變成全球最受歡迎女團嘅刻苦過程。
美國天后Taylor Swift嘅Miss Americana,電影有齊佢嘅表演片段,仲展示咗Taylor隨住音樂事業成長,運用自己嘅知名度及影響力,就政治、社會環保等問題發聲,面對龐大網軍聲討如何應對等,Miss Americana仲入埋Sundance國際影展添。
90年代香港歌手都幫電視台拍過唔少音樂特輯,幾乎有一首hit歌都會拍,梅豔芳、四大天王、周慧敏、王菲等全部拍過,印象中無咩歌手出過紀錄片,依家終於有啦!曾經嘅「烈女」偶像楊千嬅,為慶祝出道25週年將會推出紀錄片《楊千嬅I.II.III MY STORY》。
可能楊千嬅從近年拍過嘅內地真人show中獲得靈感,深明私生活比佢嘅作品更吸引,所以紀錄片有別頭先介紹過嘅外地明星紀錄片,唔係以事業高低為骨幹,反而將初出茅廬後生女、結婚為人妻同做人阿媽等人生三個階段作分水嶺,回顧出道25年歷程。
電影用咗1年時間攝製,紀錄楊千嬅巡迥演唱會片段,亦訪問佢最親嘅家人、多位圈中戰友及一些圈外好友,楊千嬅仲話「上天給予嘅挫敗令我有所領悟,我會堅持自己,哪怕一日只有一個觀眾,我都會繼續唱落去。」
《楊千嬅I.II.III MY STORY》將於本月17日喺戲院限量上映,之後會於網上平台上架。
更多電影文章
【電影LOL】大熱劇Emily in Paris女主角 3套Lily Colins走漏眼之作
【電影LOL】今個星期睇咩戲 《信用欺詐師JP:公主篇》《冥通銀行特約:翻生爭霸戰》《整容液》《新聞守護者》