電影LOL︳《奇異博士》預告片曝光勁多彩蛋 《變種特攻》Professor X現身 影迷超振奮！

美國時間星期日舉行年度體育盛事美式足球超級碗(Superbowl），中場表演嘉賓陣容盛大，歷年上台表演得嘅都係天王天后級數，好似Beyonce、Lady Gaga、JLo、Kate Perry等。球賽全國轉播勁多人收睇，所以賽事嘅廣告時段成為各大品牌必搶之物，荷里活片廠慣常會用嚟曬最新作品，今年最多人談論一定係Marvel嘅《奇異博士2：失控多重宇宙》片段！

Marvel緊接30秒電視廣告後於電子平台推出《奇2》最新預告，電影延續《蜘蛛俠：不戰無歸》劇情，講述奇異博士開啟多元宇宙後情況失控。片段見到奇異博士女友Dr. Christine Palmer（Rachel McAdams飾)嘅婚禮場面，不過新郎似乎唔係奇異博士！

畫面一轉見一堆黑雲濃煙從天而降直逼一條村落，不過黑煙唔係重點，而係畫面出現一位牛頭巨人，相信係日後成為奇異博士徒弟兼繼承斗蓬嘅Rintrah！見完徒弟仲要見師父Mordo（Chiwetel Ejiofor飾），師徒見面唔係聚舊，奇異博士被帶上手扣，被似足《復2》嘅奧創(Ultron）押去見大人物！

呢個大人物暫未露面得部份背影，不過單憑把聲同個光頭，幾肯定佢係《變種特攻》（X-Men)由Sir Pactrick Stewart飾演嘅Professor X!呢個畫面令人亢奮，有機會《奇2》可以見到由最強超級大腦組成嘅光明會（llluminati），同時意味《變》系列逐步加入Marvel電影！

《奇2》同首集隔足6年，睇預告片就明點解要搞咁耐，隨住多元宇宙開啟，唔止一個奇異博士或紅女巫同場，又正又邪已經睇到眼花花！另外仲有其他Marvel角色串連劇情，好似明明見到有Marvel 隊長，但又唔係Brie Larson飾演嘅版本，又有新英雌America Chavez初登場，依家仲要為X-men舖路，真係秒秒鐘都係彩蛋！

Marvel電影未崛起之前，超級英雄電影劇情通常簡單直接，睇電腦特效同俊男美女多。依家Marvel將片種提昇至另一層次，睇親戲都要盡用大腦潛能，偵探上身留意畫面全部細節，《奇異博士2：失控多重宇宙》似乎資訊量更多，娛樂大片都好燒腦！

更多電影文章

電影LOL︳黑幫大佬變煮飯公 日漫《極道主夫》拍完劇集再上大銀幕

電影LOL︳似科幻片多過卡通 《光年正傳》預告片曝光 巴斯光年終於係太空英雄

電影LOL︳奧斯卡提名公布 《沙丘瀚戰》十項提名演員冇份 Lady Gaga影后五強不入 古天樂監製動畫入圍爭獎

電影LOL︳台灣賀歲片冠軍 《我吃了那男孩一整年的早餐》台式青澀浪漫美味

電影LOL︳史匹堡爆seed一年2套新戲上畫 半自傳The Fabelmans搵名導David Lynch演出

電影LOL︳《蜘蛛俠》相關人物陸續登場 《魔比煞》4月上映 《格雷》索女演蜘蛛夫人

電影LOL︳水行俠Jason Momoa加入《狂野時速10》 網友︰終於有個男角有頭髮

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載