雅虎香港新聞 電影LOL︳荷里活殭屍片今年全仆？新片The Last Voyage of the Demeter開畫僅收成本15％
睇殭屍片，好驚。睇殭屍片條數嘅片商，今年仲驚。
荷里活今年至今有2套殭屍片上畫，最新一套The Last Voyage of the Demeter剛過去嘅周末開畫，結果成績強差人意，北美地區只係收到650萬美元（下同），對比套戲4500萬成本，的確冇眼睇。假如用行內傳統計法，將宣傳等成本計算在內，即係票房收入要係成本三倍先至真正回本的話，咁……套戲都仆得幾直。
唔少殭屍片都係以「殭屍界KOL」（吓？）尼古拉伯爵為主線，The Last Voyage of the Demeter都唔例外，正正以1897年《尼古拉》原著小說嘅篇章The Captain’s Log擴展而成，故事講尼古拉伯爵由羅馬尼亞Transylvania 出發去倫敦嘅過程。
今年較早時都有一套荷里活殭屍片《吸血鬼奴才：雷菲爾》(Renfield)上映，開畫條數同樣麻麻，只得8百萬。《吸血鬼奴才：雷菲爾》有尼古拉斯基治、Nicolas Hoult同金球影后Awkwafina座陣，牌面睇落唔錯，加上係黑色喜劇較易入口，埋單全球都只得2630萬，亦即係電影製作成本嘅4成多少少，好大機會打入年度十大……蝕錢嗰隻。而以走勢計，The Last Voyage of the Demeter埋單票房都應該唔會好得去邊。
The Last Voyage of the Demeter想蝕少啲，仲有最後機會 — 串流平台！雖則有驚慄大師史提芬京同拍開奇幻片種嘅金像大導Guillermo del Toro口碑加持，但爛蕃茄分數比起《吸血鬼奴才：雷菲爾》更低，似乎更唔樂觀。今年過後，跟紅頂白嘅荷里活相信冇咩片商夠膽再開殭屍片住。
更多電影文章
電影LOL 今期睇咩戲︳陰目偵信／GT跑車浪漫旅／忍者龜：變異危機／新次元！蠟筆小新大電影
電影LOL︳《神奇女俠》爆羅生門 Gal Gadot實牙實齒話開第3集 消息人士：無傾過
電影LOL︳可愛樹懶好兇殘 新片Slotherhouse要你慢慢死
電影LOL︳《封神第一部》內地票房逆轉勝 靠口碑仲靠小鮮肉爆肌？
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
