電影LOL︳《封神第一部》內地票房逆轉勝 靠口碑仲靠小鮮肉爆肌？

早前我哋提過，內地電影導演烏爾善執導嘅史詩巨製《封神三部曲》首部曲《封神第一部：朝歌風雲》，上映後票房麻麻，開畫票房接近5千萬（人民幣，下同），絕對唔算亮麗。不過隨後《封神》票房出現逆轉，連續10日成為每日票房冠軍，現時累積票房超過13億元，打入今年暑假檔頭5位。中間到底發生過什麼事？

即使《封神第一部》早於2017年開始籌備，投資超過30億元人民幣，但係由確定檔期到上映之前，《封神第一部》本身就不被睇好，因為《封神》呢個故事已經喺內地影視作品出現n次，對觀眾而言新鮮感欠奉。甚至有人未睇就批死「仆硬」！

到開始預售，條數都唔多靚仔。同期另一套戲由王寶強自導自演、以MMA為題材嘅《八角籠中》單日預售數字最少都3千萬，但《封神第一部》就只有5分之1。後來電影上畫後，雖然票房成績唔突出，但係口碑似乎唔錯，有人甚至話「竟然好睇」。受正評催谷，《封神第一部》上映後首個周末，2日都錄得過億票房。更誇張係第2個周末嘅票房更上層樓，夾埋收過3億！

口碑以外，電影宣傳識得變陣都值得一讚。《封神第一部》海報大頭係一班大牌明星如費翔、黃渤、陳坤同袁泉等，但後來轉移宣傳焦點去片中被稱為「質子旅男團」嘅幾位年青演員于適、陳牧馳、此沙、侯雯元、黃曦彥、李昀銳。佢地為套戲操肌之餘，仲要入營封閉式訓練學騎馬、射箭、武術、鼓樂等。勁到一個點係，于適為套戲學騎馬射箭學到參加比賽拎到獎。呢啲故事加上爆肌相，吸引到唔少年青觀眾有興趣，而于適等人嘅人氣仲因為套戲而彈起。

以而家嘅走勢，內地票房網站貓眼已經將《封神第一部》總票房預測數字，推上去24億，比起開畫後預測嘅12億多一倍。電影公司亦都食住個勢，將《封神第二部》嘅宣傳照公開。

更多電影文章

電影LOL 今期睇咩戲︳電影多啦A夢：大雄與天空的理想鄉／極悍巨鯊2：深溝／鬼咁多大屋／我愛你！

電影LOL︳《芭比Barbie》官方帳戶抽水回應惡搞核爆圖 日本網民聲言抵制 華納發聲明道歉

電影LOL︳Barbie芭比繼續熱爆全球收7.7億美元 奧本海默衝4億 名導哥普拉大讚2片對壘

電影LOL︳《江湖》導演黃精甫轉戰台灣 新片《周處除三害》10月上映

電影LOL︳「沙人」爆料《蜘蛛俠》有望拍第4集 元祖級導演親自操刀？

電影LOL︳30億元人仔鉅片 《封神第一部》內地票房麻麻隨時蝕一半？

電影LOL︳暑假壓軸新片The Retirement Plan 又係尼古拉斯基治！又係老豆救女！

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！