電影LOL︳暑假壓軸新片The Retirement Plan 又係尼古拉斯基治！又係老豆救女！

一度因為投資失利而要「跑數」狂接戲嘅尼古拉斯基治，並冇因為咁而做臭個名，反而越拍越有，今年8月底暑假壓軸檔將會有「蛋治」嘅新片The Retirement Plan。

故事好簡單︰尼古拉斯基治飾演嘅Matt係退休阿叔，點知阿女(Ashley Greene）同孫女被壞人捉咗去熱帶島仔，Matt叔趕到救駕，阿女先發現 － 咦，老豆點解你咁揪得？咁當然就會揭出老豆之前係做咩工，然後三代同堂避過追殺啦。係咪好有Liam Neeson《救參》系列嘅味道先？不過呢套係喜劇。

呢期「蛋治」同沙灘寧舍有緣。今年康地影展賣片會嘅片單上，已知尼古拉斯基治另一套新片The Surfer都係以沙灘做背景。「蛋治」會飾演喺美國生活多年嘅澳洲人，佢重返位於海邊嘅老家，但係個灘已經被一班衝浪客霸地盤。尼古拉斯基治將要面對日益緊張嘅衝突，故事應該唔係The Retirement Plan嗰類輕輕鬆鬆。

計埋The Retirement Plan，尼古拉斯基治今年8個月內至少有5套戲上畫，另外有3套下年會上，仲有2套準備開機，包括The Surfer。曾經連自選影院（串流平台嘅低科技前身）細片都拍嘅「蛋治」，還晒債仲繼續有工開，真係坎坷過後有艇搭。

更多電影文章

電影LOL 今期睇咩戲︳兒凶：血色大門／貴公子／守護天使的失格／疫起／隨盲柳入眠的女人

電影LOL 今期睇咩戲︳奧本海默／Barbie 芭比／老公死亡筆記／惠子的凝視

電影LOL︳荷里活演員罷工 湯告魯斯幫手斡旋 各大電影節準備變陣

電影LOL︳演員工會罷工 藝人爭相踢爆片商慳錢賤招︰用AI取代茄喱啡

電影LOL︳涉及核爆敏感話題 網傳《奧本海默》被拒日本上映 電影公司未有明確表示

電影LOL︳巨星也罷工！荷里活演員工會加入工潮 專家估計損失達40億美元

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！