電影LOL︳荷里活演員罷工 湯告魯斯幫手斡旋 各大電影節準備變陣

荷里活編劇工會5月展開罷工之後，上周演員工會亦加入罷工行列。工潮下，大部份電影製作停工，連帶日後電影上映計劃延後，直接影響戲院業務及國際電影節嘅運作。

湯告魯斯一直大力支持戲院業發展，強調大銀幕體驗無法以串流平台取代，疫情期間力推《壯志凌雲：獨行俠》於院線上映。電影獲得重大成功全球大收14億美金，連大導演史匹堡都大讚阿湯哥以一人之力救返戲院！

湯哥套《職業特工隊：死亡清算上集》喺罷工前已經上映，而佢嘅宣傳工作亦已完成，不過佢亦不忘為戲院界發聲，嘗試於工會及電影公司之間斡旋。

因為演員罷工，意味連電影宣傳工作都唔做得。日前Christopher Nolan新作《奧本海默》於倫敦舉行首映禮，戲中主演雖有出席，不過中途離場以表立場，唔排除接落嚟嘅新片會完全無星出面宣傳！而湯告魯斯深明明星曝光對電影票房有正面影響，所以出手希望工會考慮，罷工期間俾演員繼續宣傳工作。

荷里活工潮同樣影響國際影展，據The Hollywood Reporter報導，即將於9月舉行嘅意大利威尼斯國際電影節主席Alberto Barbera，已著手籌備無美國電影參展嘅「泛歐洲電影節」（Pan-European Festival）呢個後備計劃。而同威尼斯影展同期舉行嘅多倫多國際電影節，亦有同樣準備。

本來威尼斯開幕電影係《以你的名字呼喚我》Luca Guadanino導演新作Challengers，若罷工持續，主演女星Zendaya將不會出席首映禮，電影曝光及話題性將大打折扣。

國際影展往往被荷里活片廠用作奧斯卡金像獎前嗩戰，製造聲勢增加奧斯卡提名機會，一眾荷里活影星因罷工缺席即將舉行嘅國際影展，最大受害人應該係荷里活電影，以及想獲得獎項肯定嘅台前幕後。

今屆威尼斯影展可能缺乏荷里活星光，不過一樣值得關注，因為女神舒淇入選成為評審之一，而終身成就獎頒予梁朝偉，值得慶賀！

更多電影文章

電影LOL 今期睇咩戲︳兒凶：血色大門／貴公子／守護天使的失格／疫起／隨盲柳入眠的女人

電影LOL︳演員工會罷工 藝人爭相踢爆片商慳錢賤招︰用AI取代茄喱啡

電影LOL︳涉及核爆敏感話題 網傳《奧本海默》被拒日本上映 電影公司未有明確表示

電影LOL︳巨星也罷工！荷里活演員工會加入工潮 專家估計損失達40億美元

電影LOL︳《小丑》式瘋狂 殺手片專家洛比桑新片Dogman 又有愛狗男冧友？

電影LOL︳《職業特工隊 : 死亡清算上集》開畫全球收2.5億美元 《芭比Barbie》被睇好高開一倍

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！