雅虎香港新聞 電影LOL︳荷里活聖誕檔票房甩轆 《水行俠與失落王國》靠中國內地票房保住DC招牌
聖誕假完喇，係時候回到現實，電影界就梗係要睇吓票房條數。近年荷里活電影票房不振，而今年聖誕4日假期，北美戲院門票銷售量比2022年跌7％，行內人都深知不妙。今個聖誕檔嘅唯一大片《水行俠與失落王國》雖然毫無懸念成為票房冠軍，不過據外媒Deadline預測，4日本土票房都只係貼近4000萬美元。
DC喎，超級英雄片喎，乜唔係下下過億嘅咩？上一套《水行俠》係2018年年尾壓軸大片，聖誕假期單係美國票房就過1億。好在呢一集《水行俠》海外票房尚算靚仔，全球收8千萬美元，單單中國就貢獻咗3000萬。
《水》嘅本土開畫數字預計會係DC宇宙排尾4，但另外2套收得麻麻嘅《自殺特攻》同埋《神奇水俠1984》，都係疫情期間串流同戲院同步上，票房麻麻情有可原……作為今年最後一套2億美元鉅製，以現時票房走勢睇估計《水行俠與失落王國》應該唔會大賺，以唔太光彩嘅成績完結「DC舊宇宙」。接下來James Gunn打造嘅新宇宙將會由2025年嘅新版本《超人》打響頭炮……打得響啦希望。
而聖誕亞軍係上映2周嘅《Wonka 旺卡》，收2800萬。季軍係合家歡動畫《鴨仔也移民》，估計4日假期收1720萬元，出品商係向來幾識捉市場口味嘅Illumination（《壞蛋掌門人》嗰間），今次《鴨》聲勢麻麻，開畫數字成為Illumination開業以來最差一套。
排第4係新一代人氣索女Sydney Sweeney嘅愛情喜劇《真的狠愛你》。呢套有Sydney水著演出，加埋冤家變情侶嘅老土but work橋段，竟然只係得800萬票房。再次證明傳統必爆嘅方程式，似乎都行唔通，行內人真係要諗諗點搞，唔係點同串流平台鬥？
更多電影文章
電影LOL 今期睇咩戲︳水行俠與失落王國／星願奇緣／河邊的錯誤／RENAISSANCE: A FILM BY BEYONCÉ
電影LOL︳伊朗導演拍特朗普青年時期經歷 男主角係荷里活扮嘢王？
電影LOL︳影壇新金童玉女 《芭比Barbie》導演Greta出任康城影展評審團主席 男友Noah執導佐治古尼新片
電影LOL︳Barbie大賣 Mattel籌拍American Girl真人版電影 幕後主腦拍過恐怖片！
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
