雅虎香港新聞 驚喜自家製金沙芋泥窩夫 灣仔全新四季花藝主題咖啡店
紙語花香Origami Florist係一間專營鮮花婚禮佈置嘅店舖，最近佢哋於灣仔開設品牌首間花藝咖啡店Natura:。咖啡店以四季花卉為室內設計概念，以品牌自家設計嘅保鮮花（又稱永生花）及乾植物佈置為主題，全屬天然素材，完好咁保留返花朵自身美態及光澤。食物方面主打多國輕食，由擁有超過十五年入廚經驗，曾於多間五星級酒店及米芝蓮二星餐廳任職嘅主廚黃宇陽主理，主廚提倡「多菜少肉」，拒絕以牛入饌，而且堅持選用本地及日本嘅新鮮食材，希望客人食出食材原味，所有菜式健康之餘味道都好有驚喜。
金沙芋泥窩夫（$128）
首先店內嘅自家製窩夫一定唔可以錯過，金沙芋泥窩夫用黑竹炭製成，兩件口味唔同，一件加上鹹蛋黃醬、豬肉鬆及爽脆椰菜絲，而另一件就係搭配香甜嘅紫芋泥、原片紫薯、水牛芝士及煙肉等，味道鹹甜交錯，鍾意就咁食或者將肉鬆加上紫芋泥到食都得，味道一定令你有驚喜！
士多啤梨火龍果窩夫（$138）
如果你係甜品控，呢個水果窩夫都啱晒你食～加入火龍果、士多啤梨及藍莓等水果，仲有堅果醉增添口感，雖然有滿滿嘅北海道忌廉，但感覺一啲都唔甜膩呀。
全日早餐（$158）
平時食All Day Breakfast嚟嚟去去都係嗰幾款，呢度都幾有特色，最特別係青苔大啡菇，鋪上麵豉香草麵包糠，配搭黑松露炒日本廣島雞蛋、迷你貝果、煙肉、車打芝士香腸、牛油果、聖女果、本地水耕菜等共八款食材。
Energy Bowl（$98）
有食想食得light啲，Energy Bowl一定滿足到你，加入乳酪、有機燕麥片、椰子、士多啤梨、藍莓、奇異果及芒果，仲好啱相機食先。
自選午餐（$128起）
灣仔區返工嘅朋友就有福喇，午市佢哋仲有供應自選嘅和食套餐，食客可依照喜好自行混搭，包括一份湯、自選兩款前菜、一款主菜及一份主食。推薦前菜日式苦瓜蛋餅，蛋餅特意將蛋黃及蛋白分開煎製，最後梅花間竹疊起，賣相好似意式千層麵。
主菜方面，咖啡豬仔骨用自家濃縮咖啡粉醃製，咖啡味濃香；另外挪威三文魚柳拌綠茶麵豉醬亦好嫩滑。
餐廳入口位仲設有一個部份售賣自家設計保鮮花，對花藝有興趣嘅朋友不妨嚟睇吓！
NATURA :
地址: 灣仔菲林明道8號大同大廈地下1-2號舖
