高海寧瞓身劇戰 冇閒情拍拖

藝人高海寧去年一口氣推出6套作品，加上在內地打響知名度，風頭一時無兩！踏入牛年，她預告工作排山倒海，暫未有閒情諗感情事，一於在事業落重注！

過去1年蹤影處處、劇接劇的高海寧（高Ling），創下4套港劇、2套內地作品出街的亮麗成績，加上演技開始獲肯定，默默耕耘多年終迎來事業春天！

談到去年一切順利，她表示牛年起步也不錯，除了有電影斟洽中，還暫有2劇在手，下月初便投入拍攝。問到演技提升可感壓力？她說：「有壓力係好事，當做到一套劇大家都讚，下一套唔會想衰，反而會變成動力。本來要開3套劇，但公司唔想我疊住，所以有部唔使拍。（可惜？）一定覺得係，公司幫我取捨。」

向細路偷師

她指新劇角色挑戰大，若然拿捏得好，定必有望攞獎，但詳情要賣關子：「演兩個年齡層，唔可以做得好低能，呢種角色我一直好想演，好同唔好只係一線之差，我會趁假期好好準備，睇戲之外，都會搵咁上下年紀嘅小朋友相處吓，留意佢哋有咩小動作。」

高Ling往年大多返家鄉南京度歲，但今年因疫情及要開劇的關係，故改為留守家中陪伴家人。感情處於空窗期的她，被問到新一年會否想拍拖，她笑說：「唔得閒，好忙！呢方面順其自然，事業剛起步，所以之後嘅計劃都以事業為主。（再置業？）好想，但樓市仍然好高，好難追到個價。」