黎彼得曲線認向余慕蓮借錢住私家醫院 負評世侄鄭中基暗指被寵壞

越來越多藝人開youtube channel，資深前輩黎彼得都玩埋一份。Peter哥近期主持網上節目爆料，本來該集係向圈中幫過佢嘅人講多謝，但係中途又提到份屬世侄嘅鄭中基，而且對呢位後輩印象麻麻。

黎彼得話好多人叫佢評論鄭中基早前宣布同經理人湘姐（何慶湘）終止合作，並公開自己受情緒病影響而酗酒，因此決定休息一輪兼去美國戒酒。黎彼得提起鄭中基就話唔會多謝對方，因為試過有一次喺TVB佢同鄭中基搭同一架𨋢，對方竟然無視Peter哥。「喂，大佬，我衰極都叫一個小小嘅藝員，你冇理由當我隱形啩？佢真係可以眼尾都唔睄你」。

Peter哥把口話唔緊要，因為依家新一代係咁，不過接住佢就提到鄭中基爸爸、香港唱片界人物鄭東漢(Norman)嘅交情。黎彼得呢集要鳴謝嘅其中一位就係鄭東漢，因為曾經係填詞人嘅Peter哥同鄭東漢係舊朋友，相識多年，而且鄭父曾經幫過忙。

黎彼得對鄭東漢評價正面，但就質疑「佢好好人，只不過會唔會縱壞個仔呢？」。Peter哥後來再負評鄭中基，指鄭「根本真係唔好嘅，你又酗酒澩咁嫪，餐餐都出事。呢鑊仲大鑊」。同時黎彼得欲言又止，但就提到另一娛圈前輩蕭若元喺個仔蕭定一幾歲時已經帶出嚟同Peter哥飲茶。

至於正題、喺娛圈幫過佢嘅人，黎彼得提到多年來患病時得到余慕蓮、劉鑾雄同黃玉郎三人雪中送炭。早幾年黎彼得「通波仔」入院，劉鑾雄幫手埋單兼且支付生活費，原來大劉好喜歡黎彼得喺《小男人周記》飾演嘅大古惑，但劉唔希望借Peter哥宣傳，所以黎都只係輕輕帶過。黎彼得喺八十年代因肝炎入院，當時老闆、漫畫界前輩黃玉郎幫佢找咗住養和條十幾廿萬嘅數，仲要當時黎已經辭咗職。

至於余慕蓮，黎彼得自言余同盧宛茵係佢圈中少數女性朋友，多年前黎因為肺積水入院，「魚毛」不時買早餐探病。余慕蓮仲幫Peter哥找咗部份私家醫院嘅數，「佢話『你邊有咁大嚿錢呀，你不如分期還啦』」。

Peter哥呢段故事，同余慕蓮早前自爆曾被人借錢住醫院嘅經歷不謀而合。當時「魚毛」話有位圈中資深藝人多年前因病入院，仲堅持住私家醫院，點知呢位藝人找唔到數，魚毛於是幫手碌住卡先。殊不知呢位資深藝人要分3年，每個月還2千蚊先還得晒筆數俾余慕蓮。魚毛透露對方縱壞個仔，去飲都會打包食物返屋企俾愛兒。對應返黎彼得質疑鄭東漢縱壞個仔嘅講法，估唔到回力鏢咁快打返轉頭。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！