黎明的4個過氣J女郎現今去向

早幾日黎明喺澳門開演會唱，中途介紹佢新簽嘅JC出場，JC著工人褲、波鞋、戴埋帽上台唱新歌《說散就散》，果然貫徹黎明捧新人聽聲不見樣嘅作風。JC把聲唔少人都讚好，連King Jer都話睇好佢，睇嚟JC有望成為樂壇新星。

正所謂一代新人換舊人，新J女郎受到矚目嘅同時，黎明歷代J女郎現今去向又如何呢：

1. 衛蘭－華納唱片

衛蘭初出道嗰陣紅到發紫，《My Love My Fate》、《心亂如麻》、《離家出走》呢堆歌無人不知，大掃女歌手獎項。不過09年受妹妹衛詩藏毒案拖累，聲勢下滑，及後身型開始走樣，甚至被黎明直指：「衛蘭肥過部電單車。」不過衛蘭有唱功，所以一直都有Fans繼續支持。2015年決定轉簽華納唱片，其後於今年推出新歌《穿花蝴蝶》，深得大眾支持，隨即成為佢第6首三臺冠軍歌，近日新歌《失戀的意義》 聽落都唔錯，睇嚟衛蘭有望重新成為樂壇一線歌手。

2. 衛詩－華納唱片

衛詩因為經家姐介紹一齊簽咗A Music，初出道走跳唱風格，拎咗唔少新人獎，《Hit Me》隻碟都有唔錯成績。 不過09年同關楚耀喺日本爆出藏毒案，因此被A Music解除唱片合約，形象插水。其後衛詩沉寂一段時間，轉而投入教會，最終於去年同家姐一齊簽華納唱片重新出發，今年終於推出新歌《被滿足的愛》，更專程去韓國同San E錄歌，正式回歸樂壇，不過就唔知可唔可以人氣反彈啦。

3. 文詠珊（Janice Man）－太陽娛樂文化

Janice Man當年同Angelababy孖公仔咁，一齊成為「o靚界女神」，不過JM簽咗A Music後一直發展平平，即使多次參與大製作電影依然回響麻麻。2014年轉投太陽娛樂文化，轉戰大陸，拍咗套大型武俠劇《蜀山戰紀之劍俠傳奇》開始打開國內市場。近年除咗拍國內劇集，仲積極轉型做打女，早前仲接咗套懸疑電影《兇手還未睡》入面仲有全裸演出，睇嚟JM真係搏到盡，務求喺影視圈打出一片天。

4. JW（王灝兒）－SUNNY IDEA

JW當年憑一首《男人信什麼》，橫掃各大樂壇獎項，亦開始為人熟悉，優美聲線亦獲得唔少人讚賞。不過JW無食住個勢，反而返咗英國完成學業，因而聲勢下滑。2015年轉簽SUNNY IDEA，首支主打《矛盾一生》獲得不錯口碑，至今瀏覽量已經達到8,567,604次數，今年兩首新歌《多少年》及《自由飛翔》亦都有唔錯成績。因而令JW近年人氣急升，經常喺各大場合出現，重新喺樂壇活躍起來。

圖片來源：衛蘭《穿花蝴蝶》MV、衛詩《被滿足的愛》MV、Janice Man@Facebook、JW王灝兒《多少年》MV