龍婷被爆戀大22年已婚丘亞葵 約會兼車廂內激吻 男方稱「Hello Kiss」 TVB回應傳聞

【17:05 更新 龍婷透過TVB Music Group回應】

／ 關於龍婷女士近日的報導

尊敬的傳媒友好及合作夥伴，

感謝您對我們旗下藝人龍婷女士的關注與支持。針對近日的媒體報導，我們希望澄清，所提及的情況完全是由於拍攝角度所致的誤解。龍婷女士與丘先生僅為多年好友，兩人之間純屬友誼。龍婷女士將持續專注於她的音樂事業發展，繼續為大家帶來更優質音樂演出。我們誠摯希望媒體及公眾能基於事實作出理解，避免不必要的誤會。如有疑問，歡迎隨時聯繫我們。 ／

43歲嘅龍婷唱功了得，喺2022年參加《中年好聲音》，雖然未能躋身三甲，但仍獲TVB簽約成為歌手。近日有傳佢同現年65歲嘅資深演唱會製作人丘亞葵約會，兼被影到喺車廂內激咀。

報道指日前丘亞葵揸車去到龍婷出席活動嘅場地附近等候佢，龍婷喺完成工作後就即刻去搵丘亞葵。佢哋首先兵分兩路，龍婷去九龍灣一個商場嘅車仔麵店搵位，而丘亞葵就去戲院買《九龍城寨之圍城》戲飛。之後，佢哋就集合一齊食嘢，期間有講有笑。睇完戲之後，佢哋再去食米線。食完米線後，佢哋就去停車場拎車，期間龍婷翹住丘亞葵手臂，之後龍婷仲將手放喺丘亞葵嘅屁股上，然後輕拍咗幾下。去到車廂內，佢哋情到濃時之際，龍婷將身軀挨向丘亞葵，然後搭對方膊頭，然後佢哋就咀咀。

有指丘亞葵已經結咗婚，老婆係前無綫製作統籌，至於女兒就喺日本留學。丘亞葵喺接受傳媒訪問時，佢就話同龍婷喺2017年經唱片界朋友介紹下認識，不過當時龍婷想搵經理人，不過佢太忙所以冇合作，直至上年先喺公開場合相遇，去到今年佢哋真係傾合作，不過就處理緊場地問題。

被問到影到二人去睇戲同用餐，期間龍婷輕拍佢屁股，兼喺車廂咀咀，丘亞葵就解釋話佢自己係一個已婚之人，同龍婷見面係為工作，二人清清白白。佢仲話呢啲相係兩個月前嘅事，當日佢哋出嚟係傾演唱會嘅事，因為夜晚同佢肚餓嘅關係，所以佢哋就去食嘢同睇到大熱電影，支持一下業界。

至於佢哋嘅親密行為，丘亞葵就話係角度問題，佢感覺唔到龍婷拍佢，而咀咀就只不過係朋友式Hello Kiss，唔係講到激咀咁誇張；而佢亦已經同老婆解釋咗。咁會唔會同龍婷斷絕來往，丘亞葵表示同之前一樣，只限工作上嘅見面。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！